პოლიტიკა

ტელეკომპანია „იბერიის“ შენობაში სპეცრაზმის შესვლის მიზანი იყო დაშინება, განსხვავებული აზრის მიუღებლობა, კრიტიკას ვერ იტანდა სააკაშვილი - ვახტანგ ხუზმიაშვილი

ჟურნალისტმა ვახტანგ ხუზმიაშვილმა „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის“ სხდომაზე ტელეკომპანია „იბერიაში“ სპეცრაზმის შეჭრა გაიხსენა.

როგორც ხუზმიაშვილმა აღნიშნა, მიზანი იყო ჟურნალისტების დაშინება.

„სპეცრაზმი, ნიღბიანები შევიდნენ „იბერიის“ შენობაში. ყველაფერი გადმოყრილი დაგვხვდა, მაგიდები აყირავებული. ადამიანს როგორ უნდა დაებადოს აზრი, რომ ტელევიზიაში, სადაც ამდენი ჟურნალისტი მუშაობს, ვინმემ კონტრაბანდა შეიტანოს ან რაღაც საბეჭდი მანქანები დაამონტაჟოს. ეს ხომ იმთავითვე იმისთვის იყო გაკეთებული, დაშინება მომხდარიყო. „ომეგაშიც“ ვერაფერი აღმოაჩინეს. „ომეგას“ დამცველად ვერ გამოვდგები, მაგრამ ვერც „ომეგაში“ იპოვეს რაღაც ყალბი აქციზური მარკების დასაბეჭდი კლიშეეები და ვერსად აღმოაჩინეს. ეს უბრალოდ საბაბი იყო“, – განაცხადა ვახტანგ ხუზმიაშვილმა.

ვახტანგ ხუზმიაშვილს კომისიის ერთ-ერთმა წევრმა, გურამ მაჭარაშვილმა კითხვა დაუსვა: „თქვენ აღნიშნეთ, რომ ეს მოხდა 2004 წლის თებერვალში, ანუ სულ რაღაც ორი-სამი თვეა, რაც „ნაციონალური მოძრაობა“ მოსულია. ასევე აღნიშნეთ და ასეც იყო, რომ ოპოზიცია, პრაქტიკულად, არ არსებობდა ქვეყანაში. მაშინ რისი ეშინოდა ხელისუფლებას?“, რაზეც ხუზმიაშვილმა აღნიშნა:

„განსხვავებული აზრის მიუღებლობა იყო, კრიტიკას ვერ იტანდა სააკაშვილი. ეს ახალი ხომ არ არის, ზოგადად, სააკაშვილს კრიტიკა არ უყვარდა. რევოლუციის მომხრე ტელეკომპანია „იბერია“ არ იყო, რადგან შევარდნაძეს მაინც უმთავრდებოდა ვადა და არჩევნების გზით მოსულიყო ხელისუფლება ხომ? მართლაც თუ გაყალბდა არჩევნები, როგორ შეიძლება, ერთ ნაწილში გაყალბდეს და მეორე ნაწილში არ გაყალბდეს. ეს ხომ მაშინაც ტყუილი იყო“.