პოლიტიკა

ტელეკომპანია „იბერიაში“ სპეცრაზმის შეჭრა დიდ შეცდომად მიმაჩნია - მიხეილ სააკაშვილი 2004 წელს ტელეკომპანია „იბერიას“ დარბევაზე

„ტელეკომპანია „იბერიაში“ სპეცრაზმის შეჭრა დიდ შეცდომად მიმაჩნია“, - ასე უპასუხა საქართველოს მესამე პრეზიდენტმა მიხეილ სააკაშვილმა გადაცემა „თავისუფალი სივრცის“ წამყვანის შეკითხვას „დღევანდელი გადასახედიდან მიგაჩნიათ თუ არა, რომ მაშინ თქვენმა ხელისუფლებამ დაუშვა შეცდომა“.

სააკაშვილის განმარტებით, მისი მაშინდელი გუნდის წევრი ირაკლი ოქრუაშვილი, „იბერიაზე“ შეჭრას განიხილავდა ასლან აბაშიძის წინააღმდეგ ბრძოლის ნაწილად.

„პირდაპირ მინდა გითხრათ, რომ მიმაჩნია დიდ შეცდომად, მაგრამ გაითვალისწინეთ, რომ 2004 წლის 19 თებერვალს ჩვენ ვიყავით სამტრო-სასიცოცხლო ბრძოლაში ასლან აბაშიძესთან, აჭარის მმართველთან. მაშინ ოქრუაშვილმა, რომელიც გამოირჩეოდა გადაჭარბებითა და ცუდი რაღაცებით და ამის გამო ბოლოს შეექმნა ჩვენთან პრობლემა, გადაწყვიტა, რომ ეს იყო ასლან აბაშიძესთან ბრძოლის ნაწილი.

მაგრამ არცერთ წუთში, არცერთ მომენტში, მიუხედავად იმისა, რომ ეს იყო დიდი უხეში შეცდომა, გადაცდომა და ყველაფერი უბედურება, არავის და მით უმეტეს მე, რა თქმა უნდა, არ მოგვითხოვია ტელევიზიის დამფუძნებლისგან ქრთამი, არ გამოგვირთმევია ქრთამი, არ გამოგვიძალია ფული.

ჩვენ თუ მიგვქონდა ფული, ესეც არ იყო სწორი. მინდა გითხრათ, მიგვქონდა ფული ბიუჯეტში - მოდით, ავაშენოთ რაბათი, სიღნაღი.

რაც მაბადია, აგერ მაქვს თან. შეადარეთ მილიარდერი ყაჩაღი ივანიშვილი , რომელიც მილიარდები გააკეთა ხალხის გაჭირვებაზე და მე, რომელსაც არაფერი არ გამაჩნია. რითიც მოვედი პრეზიდენტობაზე, იმით წავედი.

ჩვენ თუ ვინმე ბიზნესმენს ვეუბნებოდით, ფული მოიტანეო, მოიტანეთ ბიუჯეტში, - ამ შემთხვევაში ეს ხალხი რას ეუბნება, ფული არ მოიტანოთ ბიუჯეტში, მოგვიტანეთ ჩვენ და ბიუჯეტში აღარ მოგატანინებ.

მინდა გითხრათ, რომ ჩვენი სისტემაც არ იყო სწორი. ჩვენ უნდა შევქმნათ საერთოდ სხვა რაღაცა, როდესაც გადსახადები იქნება დაბალი და როცა არავინ აღარავის აღარ მოსთხოვს თუნდაც ბიუჯეტში ფულს.

როცა ამბობენ, უჰ, ნაციონალების დროსაც ასე იყო და დღესაც ეგრეაო, სრული სისულელეა“, - თქვა სააკაშვილმა.

ცნობისთვის, 2004 წლის დარბევის შემდეგ „იბერიამ“ მაუწყებლობა 9 წლის შემდეგ, 2013 წელს განაახლა.