სამართალი

ტელეკომპანია „იბერია“-ის საქმეზე სასამართლოში გამოძიებლები დაკითხეს

ტელეკომპანია ,,იბერიას“ სამაუწყებლო ლიცენზიის იძულებით დათმობის საქმეზე თბილისის საქალაქო სასამართლოში პროცესი ბრალდების მხარის მტკიცებულებების გამოკვლევით განახლდა.

დღევანდელ სასამართლო პროცესზე მოწმის სახით დაიკითხენ ,,ომეგა ჯგუფის“ მიმართ უფლებამოსილების გადამეტების საქმის გამომძიებლები - გოჩა საათაშვილი და გიორგი მიქავა.

როგორც პროცესზე გიორგი მიქავამ აღნიშნა, სწორედ ,,ომეგა ჯგუფის“ საქმიდან ცალკე წარმოებად გამოიყო ,,იბერიას“ სამაუწყებლო ლიცენზიის იძულებით დათმობის საქმე.

გოჩა საათაშვილს 2011 წლის სექტემბერში მიეწერა აღნიშნული სისხლის სამართლის საქმე გამოსაძიებლად, გიორგი მიქავა კი საგამოძიებო მოქმედებებში 2015 წლის მარტიდან ჩაერთო.
სასამართლოს წინაშე დაკითხვისას გამოძიებლებმა აღწერეს, როგორ აწარმოებდნენ საგამოძიებო მოქმედებებს.

კერძოდ, საათაშვილმა და მიქავამ ისაუბრეს იმაზე, როგორ ხდებოდა მოწმეთა დაკითხვები, როგორც მუშაობდნენ საქმეში არსებული დოკუმენტების ექსპერტიზაზე და სხვადასხვა უწყებიდან ინფორმაციის გამოთხოვაზე.

,,დღევანდელ სასამართლო პროცესზე დაიკითხნენ სისხლის სამართლის საქმის გამომძიებლები გოჩა საათაშვილი და გიორგი მიქავა, რომლებმაც ისაუბრეს იმის შესახებ, თუ რა გარემოებებში მოხდა მათ მიერ საგამოძიებო მოქმედებების ჩატარება.

მათ დაადასტურეს, რომ სწორედ საპროცესო კოდექსის ნორმების სრული დაცვით ჩაატარეს საგამოძიებო მოქმედებები და ამ საქმის შესახებ სასამართლოს მიაწოდეს ამომწურავი ინფორმაცია“, - განაცხადა „იბერია ტვ“-ის საქმის პროკურორმა ემზარ გაგნიძემ დღევანდელი სასამართლო პროცესის დასრულების შემდეგ.

საქმეზე მომდევნო სხდომა 2017 წლის 5 დეკემბერს 15:30 საათისთვის ჩაინიშნა.

შეგახსენებთ, რომ ტელეკომპანია ,,იბერიას“ სამაუწყებლო ლიცენზიის იძულებით დათმობის საქმეზე ბრალდებულები არიან ყოფილი გენერალური პროკურორი ზურაბ ადეიშვილი და გენერალური პროკურორის ყოფილი მოადგილე გიორგი ლაცაბიძე.

ნინო ექვთიმიშვილი