პოლიტიკა

თეა წულუკიანის თქმით, თუ ის მთავრობის ახალ შემადგენლობაში იქნება, ის კონკრეტულ იდეებს წარადგენს

იუსტიციის მინისტრის, თეა წულუკიანის განცხადებით, მთავრობის შემადგენლობის შედგენა არის პრემიერ-მინისტრ მამუკა ბახტაძის პრეროგატივა და ყველა უნდა დაელოდოს მის გადაწყვეტილებას.

მინისტრმა აღნიშნა, რომ არსებული პროცედურით მამუკა ბახტაძემ უნდა შესთავაზოს თავისი კაბინეტის შემადგენლობა და კანდიდატები იმ პარტიას, რომელსაც უმრავლესობა აქვს პარლამენტში.

„როგორც ვიცით, დღეს პრემიერ-მინისტრი ასრულებს კონსულტაციებს მმართველ პარტიასთან, რათა მისი იდეა, რომელიც სამინისტროების შემცირებას ეხება, დეპუტატებთან იყოს განხილული. საბოლოო გადაწყვეტილება, დაეთანხმებიან თუ არა მმართველი პარტიის წევრები ამ წინადადებას, დღეს გახდება ცნობილი. დიდი იმედი მაქვს, რომ პრემიერ-მინისტრის ამ ინიციატივას „ქართული ოცნების“ რიგებში ფართე მხარდაჭერა ექნება”, – განაცხადა წულუკიანმა.

მისი განმარტებით, მცირე მთავრობა გულისხმობს იმას, რომ ნაკლებმა რესურსმა უფრო მეტი საქმე გააკეთოს.

„იმედი მაქვს, ახალი შემადგენლობა, რომელიც ნდობას მიიღებს, ის სამინისტროები ვინც გაერთიანდებიან, შეძლებენ, რომ ეს იდეები განახორციელონ პრაქტიკაში", - განაცხადა წულუკიანმა.

მინისტრის თქმით, იმ შემთხვევაში, თუ ის ახალ შემადგენლობაში მოხვდება, მას კონკრეტული იდეები ექნება, თუ როგორ უნდა გატარდეს იუსტიციის სამინისტროში მცირე მთავრობის იდეა პრაქტიკაში.