პოლიტიკა

თეა წულუკიანი 6 წელია, შეუცვლელია, ის შავი სამუშაოს შემსრულებელია - რომან გოცირიძე

„ნაციონალური მოძრაობის“ წევრმა, რომან გოცირიძემ ხელისუფლება პარლამენტის საგამოძიებო კომისიების შექმნის სელექციურ შერჩევაში დაადანაშაულა. მისი თქმით, ხორავას ქუჩაზე მოზარდების მკვლელობის მსგავსად, 2 კვირის წინ „ენმ“-მ მოითხოვა კომისიის შექმნა პანკისის ხეობაში ჩატარებული სპეცოპერაციის შედეგად დაღუპული თემირლან მაჩალიკაშვილის საქმეზეც, თუმცა ამ ინიციატივას უმრავლესობამ მხარი არ დაუჭირა.

მისივე თქმით, ხელისუფლება ხორავას ქუჩის საქმეზე საგამოძიებო კომისიის შექმნას მხოლოდ საზოგადოებრივი ზეწოლის შედეგად დათანხმდა, თუმცა შეეცდება, რომ ამ ხერხით საქმემ აქტუალობა დაკარგოს.

გოცირიძემ ასევე მოითხოვა იუსტიციის მინისტრის, თეა წულუკიანის გადადგომა და აღნიშნა, რომ უწყების ხელმძღვანელი „შავი სამუშაოს შემსრულებელია“.

„რამდენი ათასი ადამიანი უნდა გამოვიდეს ქუჩაში, რომ თქვენ იძულებული გახდეთ, შექმნათ დროებითი საგამოძიებო კომისია. ორი კვირის წინ ქალბატონმა სალომემ [სამადაშვილმა], რომელიც ამ ტრიბუნაზე იდგა, წარმოგვიდგინა მაჩალიკაშვილის მკვლელობასთან დაკავშირებით დროებითი საგამოძიებო კომისიის შექმნა, რომელიც ერთსულოვნად ჩააგდეთ. ახლა თქვენ მეორე კომისიას უჭერთ მხარს.

რომ წარმოვადგინოთ ხელახლა, დაუჭერთ თუ არა მაჩალიკაშვილის მკვლელობასთან დაკავშირებით კომისიის შექმნას მხარს? რატომ ხდება კომისიის შექმნის სელექციური შერჩევა, ორივე შვილმკვდარი მამა ხო ერთსა და იმავე მდგომარეობაშია, ანუ ეს კომისია იმიტომ იქმნება, რომ გაიძულათ საზოგადოებრივმა პროტესტმა, მაგრამ ამავე დროს გინდა გამოიყენოთ, როგორც ხრიკი, როგორც ფანდი ვითარების დეაქტუალიზაციისა და თქვენ მიერ შექმნილი უსამართლო და ძალადობრივი სისტემის გადარჩენისა.

ჩვემ კი არა, მთელი საზოგადოება და არასამთავრობო სექტორი ითხოვს წულუკიანის გადაყენებას. მინისტრი 6 წელია, შეუცვლელია. ყველა მინისტრი შეიცვალა, 5-ჯერ შეიცვალა ინფრასტრუქტურის მინისტრი და პროკურორი მეხუთეჯერ ინიშნება, მაგრამ ერთადერთი შეუცვლელი კადრი არის ქალბატონი წულუკიანი, რომელიც შავი სამუშაოს შემსრულებელია. მთელი ეს პროცესი მიმართულია იქითკენ , მათ შორის ეს კომისია, რომ მოხდეს დროის გაჭიანურება და ხელუხლებელი დარჩეს ეს სისტემა, რომლის დამსხვრევასაც ითხოვს ქუჩაში გამოსული ხალხი“, -განაცხადა გოცირიძემ.