პოლიტიკა

თბილისსა და ნატოს თანამშრომლობის გაძლიერება შეიძლება ჩაშალოს ორი ქვეყნის ხალხისთვის მომგებიანი პროცესი - რუსეთის საგარეო უწყება

რუსეთის საგარეო საქმეთა სამინისტრი, 7 ივლისს პრაღაში გამართული აბაშიძე-კარასინის მორიგი შეხვედრა შეაჯამა.

უწყების განცხადებაში ნათქვამია, რომ „ტრადიციულად, იყო განხილული კონკრეტული საკითხები, რომლებიც რუსეთ-საქართველოს კავშირების განვითარებას შეეხება ისეთ სფეროებში, სადაც დიპლომატიური ურთიერთობის არარსებობის პირობებში პროგრესი შესაძლებელია, ესენია: ვაჭრობა, ტრანსპორტი, ჰუმანიტარული კონტაქტები“.

„მიმდინარე წლის პირველ კვარტალში, რუსეთსა და საქართველოს შორის ტვირთბრუნვა 10%-ით გაიზარდა და 302 მილიონი დოლარი შეადგინა. რუსეთში ქართული ღვინოს შეტანა გაორმაგდა, ასევე ინარჩუნებს ზრდის ტენდენციას სოფლის მეურნეობის პროდუქცია.

ასევე ზრდადია რუსი ტურისტების რაოდენობა. სამწუხაროდ, ამ სფეროში ნორმალური თანამშრომლობის განვითარებას ხელს „ოკუპირებული ტერიტორიების შესახებ“ კანონი უშლის.

ორმხრივი ვაჭრობის ზრდამ ასევე საავტომობილო გადაზიდვები გაზარდა, რაც საქართველოს სამხედრო გზაზე შეუფერხებლად გადაადგილების აქტუალურობას უსვამს ხაზს. ამასთან დაკავშირებით, მხარეები შეთანმხდნენ, რომ უახლოეს დროში „ზემო ლარსის ყაზბეგის“ გამშვები პუნქტის მოდერნიზაციის საკითხები შეიმუშაონ, რომელშიც მონაწილეობას ორი ქვეყნის დაინტერესებული უწყებების ექსპერტები ჩაებმებიან.

სავაჭრო კავშირების განვითარებისთვის მნიშვნელოვანი როლის შემსრულებელი შეიძლება გახდეს 2011 წლის შეთანხმება საბაჟო ადმინისტრირებისა და ვაჭრობის მონიტორინგის შესახებ. მხარეებმა აღნიშნეს მზაობა, დოკუმენტში არსებული ყველა პუნქტის შესრულებასთან დაკავშირებით, ასევე უახლოეს დროში ხელი მოაწერონ კონტრაქტს შვეიცარიულ კომპანიასთან პროექტის რეალიზაციასთან დაკავშირებით.

ასევე, აღნიშნული იყო საჰაერო მიმოსვლის ზრდა.

მხარეებმა, ორმხრივი ურთიერთობის ნორმალიზაციის გაგრძელების მზაობა დაადასტურეს. ამასთან, რუსულმა მხარემ კვლავ გაუსვა ხაზი, რომ თბილისსა და ნატოს თანამშრომლობის გაძლიერება და საერთაშორისო ასპარეზზე გახშირებული მტრული რიტორიკა ქართველი ოფიციალური პირების მხრიდან, სავაჭრო, სატრანსპორტო და ჰუმანიტარული კავშირების გამყარების ტენდენციას ეწინააღმდეგება. ასეთმა რიტორიკამ შეიძლება ჩაშალოს ორი ქვეყნის ხალხისთვის მომგებიანი პროცესი“,-ნათქვამია განცხადებაში.

მონიკა დავლიანიძე