პოლიტიკა

თბილისის საკრებულოს ოპოზიციონერი დეპუტატები საერთაშორისო ორგანიზაციების წარმომადგენლებს შეხვდნენ

თბილისის საკრებულოს ოპოზიციონერმა დეპუტატებმა, საერთაშორისო ორგანიზაციების NDI, IRI-ის და ამერიკის საელჩოს წარმომადგენლებთან შეხვედრა გამართეს.

დეპუტატების განცხადებით, საუბარი მერიის უკანონო გადაწყვეტილებებს შეხო, მათ შორის მოსამართლე ნატა ნაზღაიძის ოჯახის წევრისთვის ქონების გადაცემის საკითხი.

მამუკა ახვლედიანის თქმით, დეპუტატებს სურდათ, რომ მათთვის აეხსნათ ის მნიშვნელოვანი პრობლემები, რომლებიც აწუხებს ქალაქის მოსახლეობას.

„ყველამ გაიგო ეს თემა, ყველამ იცის უკვე ნაზღაიძესთან დადებული საეჭვო და კორუფციული გარიგება. ასევე ვესუაბრეთ იმაზე, რომ დავით ნარმანიას საქციელი, მისი არმოსვლა თბილისის საკრებულოში, თანამშრომლების არგამოშვება თბილისის საკრებულოში, არის კანონის უხეში დარღვევა და იგი არის დასჯადი ქმედება“,-აღნიშნა ახვლედიანმა.

საკრებულოს დამოუკიდებელი დეპუტატის ალექსანდრე ელისაშვილის განცხადებით კი, დეპუტატები არ მოეშვებიან ნატა ნაზღაიძის საკითხს, რადგან მისი თქმით, ეს არის სერიოზული კორუფცია, რომელშიც დავით ნარმანია და მისი სტრუქტურებია ჩართული.

„ჩვენ დღეს გვქონდა ერთ-ერთი მორიგი შეხვედრა. მანამდე იცით, რომ აუდიტის სამსახურის უფროსს შევხვდით, პროკურატურაში შევიტანეთ განცხადება, მანამდე, საკრებულოში იყო საკითხი დასმული, არასამთავრობო ორგანიზაციებს შევხვდით. ჩვენ ამ საკითხს არ მოვეშვებით. ეს არის ძალიან სერიოზული კორუფცია, რომელშიც თავით ბოლომდე არის ჩართული ნარმანია და მისი სტრუქტურები და სამსახურები“,-აღნიშნა ალექსადნრე ელისაშვილმა.

მონიკა დავლიანიძე