პოლიტიკა

თბილისის საკრებულოს ოპოზიცია მერიას ბიუჯეტის არამიზნობრივ ხარჯვაში ადანაშაულებს

თბილისის საკრებულოს ნაციონალური მოძრაობის წევრები დედაქალაქის მერიას ბიუჯეტის არამიზნობრივ ხარჯვაში ადანაშაულებენ.

საკრებულოში დღეს გამართულ ბრიფინგზე ოპოზიციონერმა დეპუტატმა, ირაკლი ნადირაძემ მერიის საპილოტე პროგრამა ,,მართე შენი ქალაქი’’ შეაფასა და აღნიშნა, რომ პროექტი ადგილობრივი თვითმმართველობის არჩევნებისთვის ამომრჩევლის მოსაზიდად ხორციელდება.

,,თბილისის მერია აპირებს, რომ ერთ-ერთი რაონის მაგალითზე, როგორიცაა საბურთალოს გამგეობა, სადაც წელს ჰქონდათ საპილოტე პროგრამა - ,,მართე შენი ქალაქი’’ და რომელზედაც წელს 600 ათასი ლარი იყო გამოყოფილი, მომავალი წლის ბიუჯეტში კი, ნახევარი მილიონი ლარია გამოყოფილი. იქ დასაქმებული ჰყავდათ 34 ადამიანი. ახლა სურთ ეს პროგრამა ათივე რაიონზე გაავრცელონ და ჯამში კიდევ ამ პროგრამაში დასაქმებულთა რიცხოვნობა დაახლოებით 350 კაცით გაზარდონ’’, - განაცხადა ირაკლი ნადირაძემ.

თავის მხრივ, ოპოზიციის ბრალდებებს არ იზიარებს საკრებულოს წევრი ,,ქართული ოცნებიდან’’ ნუგზარ მალაყურიძე. მისი თქმით, საპილოტე პროექტის მიზანია ბინათმესაკუთრეთა ამხანაგობების წევრთა კვალიფიკაციის ამაღლება.

,,ეს პროექტი ემსახურება ზუსტად ნაციონალური მოძრაობის დროს გაფუჭებული საქმეების შემოტრიალებს. მოქალაქეთა პასუხისმგებლობის ამაღლებას, ზოგან შესაძლოა, სარეკლამო აბრების განთავსებას, ზოგან თუ სახლი მდგრადია, დაშენებას ზემოდან და ამ ფართების გაქირავებას. აქედან გამომდინარე, ეს რომ ადამიანებს ასწავლო, თუნდაც დაუთვალო, ბიზნესგეგმა მისცე, ამას სჭირდება ახსნა-განმარტება და დახმარება’’, - განაცხადა მალაყურიძემ.

ნინო ექვთიმიშვილი