პოლიტიკა

თბილისის საკრებულომ თაბორის მთასა და პუშკინის სკვერთან მდებარე მიწის ნაკვეთების პრივატიზების საკითხები დაამტკიცა

თბილისის საკრებულომ სხდომის დღის წესრიგში გათვალისწინებულ მე-5 და მე-6 საკითხებს, თაბორის მთასა და პუშკინის სკვერთან მდებარე ტერიტორიების პრივატიზებას კენჭი უყარა.

ოქროყანის დასახლებაში მდებარე 4433 კვ.მ. მიწის ნაკვეთის პირდაპირი განკარგვის ფორმით პრივატიზებას საკრებულოს 31-მა დეპუტატმა მხარი დაუჭირა, 2 წინააღმდეგ წავიდა, ხოლო 1-მა თავი შეიკავა.

რაც შეეხება პუშკინის ქუჩაზე, ,,ცეკავშირის“ მიმდებარე ტერიტორიაზე არსებული 1900 კვ.მ. მიწის ნაკვეთის პრივატიზებას, საკითხს 29 დეპუტატმა დაუჭირა მხარი, ხოლო 3-მა წინააღმდეგ მისცა ხმა.

საკრებულოს სხდომა ხმაურის ფონზე მიმდინარეობდა. ძალის გამოყენებით ბიუროს სხდომიდან გაიყვანეს საკრებულოს დეპუტატი „ერთიანი ნაციონალური მოძრაობიდან“ ირაკლი ნადირაძე, პროტესტის ნიშნად სხდომა დატოვა ენმ-ის მეორე წევრმა მარიკა დათუკიშვილმა. ოპოზიციას პროტესტის ნიშნად კენჭისყრაში მონაწილეობა არ მიუღია.

საკრებულოს ბიუროს სხდომაზე ოპოზიცია მოითხოვდა ამ საკითხების ამოღებას დღის წესრიგიდან, თუმცა საკრებულოს თავმჯდომარემ, გიორგი ალიბეგაშვილმა ეს მოთხოვნა არ დააკმაყოფილა.

საკრებულოს თავმჯდომარის, გიორგი ალიბეგაშვილის გადაწყვეტილებით, სხდომის დასწრების უფლება ჰქონდათ მხოლოდ საკრებულოს დეპუტატებს, თანამშრომლებსა და მედიის წარმომადგენლებს.

კენჭისყრის პარალელურად საკრებულოს შენობასთან აღნიშნული მიწის ნაკვეთების პრივატიზებას აპროტესტებდა „ნაციონალური მოძრაობა“ თავის მხარდამჭერებთან ერთად. აქციაზე სიტუაცია რამდენჯერმე დაიძაბა.

შეგახსენებთ, 29 სექტემებერს თბილისის საკრებულომ ბიძინა ივანიშვილთან დაკავშირებით ორი გადაწყვეტილება მიიღო. საკრებულომ პუშკინის სკვერთან, „პანორამა თბილისის“ სასტუმროს მიმდებარედ მიწისქვეშა ავტოსადგომის ასაშენებლად მიწის ნაკვეთს ფუნქციური ზონის სტატუსი შეუცვალა, ხოლო თაბორის მთაზე მდებარე ტერიტორიას რეკრეაციული სტატუსი „თაბორი რიზორთსის“ სასარგებლოდ მოხსნა. თაბორის მთის აღნიშნულ ტერიტორიაზე ბიძინა ივანიშვილთან დაკავშირებულ კომპანიას გოლფის მოედნების მოსარწყავად საირიგაციო ნაგებობის აშენება სურს.

ანა მებურიშვილი