პოლიტიკა

თბილისის საერთაშორისო აეროპორტში ირანის მოქალაქეთა მიმართ მართლსაწინააღმდეგო, მათ შორის რელიგიური გრძნობების შემლახავი რაიმე ქმედება არ დასტურდება - საგარეო უწყება

საგარეო საქმეთა სამინისტროს ინფორმაციით, თბილისის საერთაშორისო აეროპორტში უსაფრთხოების ზომებიდან გამომდინარე გადამოწმების პროცედურებზე ირანის მოქალაქეთა მიმართ მართლსაწინააღმდეგო, მათ შორის რელიგიური გრძნობების შემლახავი რაიმე ქმედება არ დასტურდება.- ასე გამოეხმურა სამინისტრო ირანის საგარეო უწყების უკმაყოფილებას, რომ თბილისის აეროპორტის უსაფრთხოების სამსახურის თანამშრომლები ისლამურ თავსაბურავს „უპატივცემულოდ ეპყრობიან“. საქმე ეხება ისფაჰანი-თბილისის რეისის შემოწმების დროს მგზავრებისთვის თავსაბურავის მოხსნის მოთხოვნას.

საქართველოს საგარეო უწყების ცნობით, აღნიშნულ საკითხთან დაკავშირებით გაიმართება შეხვედრა ირანის ელჩთან.

„ქართული მხარისთვის ირანის დიპლომატიური არხებით ცნობილი გახდა, რომ თბილისის საერთაშორისო აეროპორტში, უსაფრთხოების ზომებიდან გამომდინარე გადამოწმების პროცედურებზე ირანის მოქალაქეთა ნაწილი უკმაყოფილებას გამოთქვამს.

ინფორმაციის მიღებისთანავე საქართველოს შინაგან საქმეთა სამინისტროს შესაბამისმა სამსახურებმა დაუყოვნებლივ დაიწყეს აეროპორტში საავიაციო უსაფრთხოების ოფიცერთა მიერ მგზავრთა გადამოწმების პროცედურების შესწავლა.

პირველადი მონაცემებით და გატარებული ოპერატიული ღონისძიებებით, ქართველი სამართალდამცველების მხრიდან მართლსაწინააღმდეგო, მათ შორის რელიგიური გრძნობების შემლახავი რაიმე ქმედება არ გამოვლენილა. აღნიშნულის შესახებ ირანის მხარეს უკვე ეცნობა.

საგარეო საქმეთა სამინისტროში ჩანიშნულია შეხვედრა ირანის ელჩთან, სადაც კიდევ ერთხელ გავივლით აღნიშნულ საკითხს“, - განაცხადეს უწყებაში.