პოლიტიკა

თბილისის მიწათსარგებლობის გენერალურ გეგმასთან დაკავშირებით გადაწყვეტილებას კახა კალაძე დღეს გამოაცხადებს

თბილისის მიწათსარგებლობის გენერალურ გეგმასთან დაკავშირებით მერიის გადაწყვეტილება დღეს გახდება ცნობილი.

გადაწყვეტილების გამოცხადებამდე, თბილისის მერი კახა კალაძე და მერიის წარმომადგენლები თბილისის საკრებულოში „სითი ინსტიტუტის“ წარმომადგენლებს კიდევ ერთხელ შეხვდებიან. შეხვედრის დასრულების შემდეგ კი თბილისის მერი ბრიფინგს გამართავს.

კახა კალაძის განცხადებით, გენერალური გეგმა იმ ფორმით, როგორც დღეს არის წარმოდგენილი, მიუღებელია.

კერძოდ, დედაქალაქის მერის თქმით, დოკუმენტში ხარვეზებია ტრანსპორტისა და კერძო საკუთრების მიმართულებით, ასევე არ არის წარმოდგენილი გეგმის განხორციელების მეთოდოლოგია.

„ჩემთვის და ჩვენი გუნდისთვის ძალიან მნიშვნელოვანია გენერალური გეგმის არსებობა. ამ დოკუმენტს რომ დაეფუძნოს ქალაქის გრძელვადიანი განვითარება, მნიშვნელოვანია, დოკუმენტი იყოს ხარისხიანი და გამართული. იმ ფორმით, რაც არის წარმოდგენილი, მიუღებელია ამ დოკუმენტის არსებობა. მე უბრალოდ მიხარია, რომ თვითონ ამ დოკუმენტის ავტორები საუბრობენ იმაზე, რომ ნორმალურია, ხარვეზები არსებობდეს და უნდა არსებობდეს კიდეც, ამიტომ ძალიან მასშტაბური დოკუმენტია. კონცეფციას რაც შეეხება, ჩვენ ვემხრობით, მისასალმებელია მწვანე ქალაქი, შეკავშირებული და კომპაქტური ქალაქი, მაგრამ ამის განხორციელება როგორი მეთოდოლიგიით უნდა მოხდეს, ეს არ არის წარმოდგენილი. პრობლემები არის ტრანსპორტის მიმართულებით, კერძო საკუთრების მიმართულებით და ეს ყველაფერი იქნება გამოსასწორებელი“, – განაცხადა კახა კალაძემ.

თავის მხრივ, როგორც „სითი ინსტიტუტის“ დირექტორი აცხადებს, თბილისის ისეთ მასშტაბურ გეგმაზე, როგორიც მიწათსარგებლობის გეგმაა, შენიშვნები უნდა არსებობდეს. ამასთან, მამუკა სალუქვაძე იმედოვნებს, რომ ხარვეზების აღმოსაფხვრელად თბილისის მერია „სითი ინსტიტუტთან“ ერთად გააგრძელებს მუშაობას.