პოლიტიკა

თბილისის მერიაში კახა კალაძის სავარაუდო მოადგილეები ცნობილია

არაოფიციალურად უკვე სახელდება რამდენიმე პირი, რომლებიც თბილისის მერიაში, სავარაუდოდ, კახა კალაძის გუნდის წევრები იქნებიან.

გავრცელებული ცნობით, თბილისის ახლადარჩეული მერი კახა კალაძე დედაქალაქის მთავრობაში საკუთარი გუნდით მივა.

საზოგადოებრივი მაუწყებლის პირველი არხის ინფორმაციით, საქართველოს ენერგეტიკისა და გარემოს დაცვის მინისტრების ყოფილი მოადგილეები ირაკლი ხმალაძე და მაია ბითაძე საქმიანობას სავარაუდოდ, თბილისის მერიაში გააგრძელებენ.

მაია ბითაძემ ერთი თვის წინ გარემოს დაცვის მინისტრის მოადგილის თანამდებობის დატოვების შემდეგ კალაძის საარჩევნო შტაბში გადაინაცვლა. მაია ბითაძეს უკავშირდება ეკოლოგიური მიმართულებით კალაძის საარჩევნო პროგრამის მომზადება.

"საზოგადოებრივ მაუწყებელთან" საქართველოს გარემოს დაცვის მინისტრის ყოფილი მოადგილე მაია ბითაძე აცხადებს, რომ სურვილი აქვს, კახა კალაძის გუნდის წევრი იყოს.

"მაქსიმალურად მაქვს სურვილი, რომ მას მხარში ამოვუდგე, რათა ის პროგრამა განახორციელოს, რომელიც წინასაარჩევნოდ ჰქონდა. რაც შეეხება კონკრეტულ თანამდებობებს, ამის თაობაზე ზუსტი განცხადება რამდენიმე დღეში გაკეთდება", - განაცხადა ბითაძემ.

რაც შეეხება ირაკლი ხმალაძეს, მას კალაძის ენერგეტიკის მინისტრად მუშაობისას მოადგილის თანამდებობა ეკავა. წინასაარჩევნო პერიოდში მან აღნიშნული თანამდებობა დატოვა და აქტიურად ჩაერთო კალაძის საარჩევნო კამპანიაში. მანვე მოამზადა თბილისის ურბანულ და ეკონომიკურ განვითარებასთან დაკავშირებული პროგრამები.

როგორც პირველ არხს ირაკლი ხმალაძემ განუცხადა, კახა კალაძის ნებისმიერ შეთავაზებას დათანხმდება.

"კახა კალაძეს ირგვლივ ძალიან ბევრი პროფესიონალი და კომპეტენტური ადამიანი ჰყავს. ყველა განწყობილია ისე, რომ იმუშაოს და იმ პოზიციაზე დადგეს, სადაც გუნდსა და თბილისს დასჭირდება. ყველაფერი თავის დროზე გახდება ცნობილი. კახასგან ნებისმიერ პოზიციაზე დავთანხმდები შემოთავაზებას“, - აღნიშნა ხმალაძემ.

ნინო ექვთიმიშვილი