პოლიტიკა

თბილისის მერია წელიწადში დაახლოებით 28 მილიონ ლარს ხარჯავს ბინათმესაკუთრეთა ამხანაგობების პროგრამებზე - რევაზ სოხაძე

თბილისის მერია წელიწადში დაახლოებით 28 მილიონ ლარს ხარჯავს ბინათმესაკუთრეთა ამხანაგობების პროგრამებზე და ბინათმესაკუთრეთა ამხანაგობების დაფინანსების წესში ცვლილება სწორედ აღნიშნული თანხის ეფექტიანად ხარჯვის მიზნით შევიდა.

როგორც თბილისის საკრებულოს დეპუტატმა, „ქართული ოცნების“ წევრმა, რევაზ სოხაძემ განაცხადა, ხშირი იყო შემთხვევა, როდესაც კომპანიები, რომლებიც ამხანაგობის დაკვეთით სამუშაოებს ასრულებდნენ, მალევე უქმდებოდნენ და მერია უხარისხოდ შესრულებული სამუშაოს გამო, პასუხს ვერავის სთხოვდა.

„ხშირ შემთხვევაში, აღმოჩნდებოდა, რომ კომპანიები, რომლებიც კონკრეტული ამხანაგობის თავმჯდომარის დაკვეთით ასრულებდნენ სამუშაოებს, სამუშაოების შესრულების შემდეგ საერთოდ უქმდებოდა და შესაბამისად, უხარისხოდ შესრულებული სამუშაოს გამო პასუხს ვერავის ვთხოვდით. მიღებული ცვლილება უზრუნველყოფს, რომ უფრო მეტი გარანტიით მოხდეს ამ თანხების ათვისება“, – განაცხადა სოხაძემ.

ბინათმესაკუთრეთა ამხანაგობების დაფინანსების წესში შეტანილი ცვლილებების გადახედვა დღეს თბილისის საკრებულოს ფრაქციამ „ევროპულმა საქართველომ“ მოითხოვა.

როგორც ფრაქციაში აცხადებენ, სწორედ აღნიშნული ცვლილებების გამო ფერხდება მნიშვნელოვანი სამუშაოები დედაქალაქში.