პოლიტიკა

თბილისის მერია ქალაქის გენგეგმის პროექტს ხვალ პარლამენტსა და საკრებულოს წარუდგენს

თბილისის მერის, კახა კალაძის განცხადებით, ის დედაქალაქის მიწათსარგებლობის გენერალურ გეგმას ხვალ პარლამენტსა და თბილისის საკრებულოს წარუდგენს.

„მე მივმართე ყველა პოლიტიკურ პარტიასა და ასევე მერობის ყოფილ კანდიდატებს, რომ ისინიც ჩართულიყვნენ, კარი ყველასთვის ღია იყო, თუმცა, მათ ჩართვა არ ისურვეს. მე მესმის, რატომაც არ ისურვეს - იმიტომ, რომ მათ არ აქვთ ეს კომპეტენცია. თუმცა, შეეძლოთ, გამოეგზავნათ კომპეტენტური პირები. არ არის საუბარი იმაზე, თუ რა არის პრობლემა. გვინდა, წარმოვადგინოთ ის პროექტი, რომელიც „სითი ინსტიტუტმა" მოამზადა და წარმოადგინა.

ხვალ ვგეგმავთ, რომ ეს პროექტი გავაცნოთ პარლამენტს, გავაცნოთ საკრებულოს და შემდეგ მივიღოთ გადაწყვეტილება. ეს ვერ იქნება უსასრულო და შესაბამისად, უახლოეს დღეებში მერიის გადაწყვეტილებას გავაცნობთ საზოგადოებას", - განაცხადა კალაძემ.

თბილისის განვითარების გენერალური გეგმის პროექტი, რომელიც 2030 წლამდეა გაწერილი, თბილისის მერიას 3 იანვარს ჩაბარდა. დოკუმენტის შესაქმნელად 2 800 000 ლარი იყო გამოყოფილი.