პოლიტიკა

თბილისის ყოფილი პროკურორის შეფასებით, აბსურდია ექსპერტის განცხადება, რომ ხორავას ქუჩაზე მომხდარი მკვლელობის საქმეზე საექსპერტო დასკვნის დადება პროკურორმა შეაჩერებინა

თბილისის ყოფილი პროკურორის, მიხეილ შაყულაშვილის განცხადებით, აბსურდულია ტრასოლოგიური ექსპერტიზის შემდგენი ექსპერტის განცხადება, რომ ხორავას ქუჩაზე 2 მოზარდის მკვლელობის საქმეზე საექსპერტო დასკვნის დადება პროკურორმა შეაჩერებინა.

„ჩემი აზრით, ეს არის სრული აბსურდი. ამ თემით მე დავინტერესდი და დავურეკე პროკურორს, რომელზეც საუბრობდა. იმ საუბარს ესწრებოდა ორი პროკურორი და სამი ექსპერტი. თუ გამოკითხავთ იმ ხალხს, დაგიდასტურებენ ამ ინფორმაციას. გაჩერება-არგაჩერება ფიზიკურად ვერ მოხდება, რადგან როცა ექსპერტი წერს დასკვნას, მას ხელი უნდა მოუწეროს ხელმძღვანელმა, მათაც აქვთ იერარქიული კიბე. გამოუშვი-არ გამოუშვა დასკვნა, ეს ფიზიკურად ვერ მოხდება. ამ ადამიანს ან ეგონა, რომ რაღაც სხვაზე დაუსვეს კითხვა, ან შეცდომაშია შეყვანილი, ან რაღაც მოეჩვენა“, - უპასუხა შაყულაშვილმა ხორავას ქუჩაზე მომხდარი მკვლელობის საქმეზე შექმნილი დროებითი საპარლამენტო საგამოძიებო კომისიის თავმჯდიმარის მოადგილის, ანრი ოხანაშვილის შეკითხვას.

ანრი ოხანაშვილის ინფორმაციით, პარლამენტის დროებითი საგამოძიებო კომისიის ერთ-ერთ სხდომაზე სასამართლო-სამედიცინო ექსპერტმა თქვა, რომ მას დასკვნის დადება პროკურატურამ შეაჩერებინა.