პოლიტიკა

თბილისის დეტექტივების სამმართველოს უფროსი იოსებ სიგუა ხორავას ქუჩის საქმის შემსწავლელი საგამოძიებო კომისიის სხდომას ავადმყოფობის გამო არ ესწრება -შსს

თბილისის დეტექტივების სამმართველოს უფროსი იოსებ სიგუა ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიის დღევანდელ სხდომას არ ესწრება. შსს-ს განმარტებით, ის ავადაა და უცნობია, როდის მოახერხებს ის კომისიაში გამოცხადებას.

„იოსებ სიგუა გახდა ავად, ამიტომ, მისი ჯანმრთელობიდან გამომდინარე, დღეს კომისიის სხდომას ვერ დაესწრება. ჯერჯერობით, არ ვიცით, როდის შეძლებს კომისიაზე გამოცხადებას. საჭიროების შემთხვევაში, კომისიას დამადასტურებელი დოკუმენტიც წარედგინება“, – განმარტეს შსს-ის პრესსამსახურში.

უწყებაში არ დაადასტურეს გავრცელებული ინფორმაცია, რომ კომისიის გუშინდელ სხდომის შემდეგ სიგუას პატაკი დააწერინეს და სამსახურიდან გაუშვეს.