საზოგადოება

თბილისის 116-ე საჯარო სკოლაში სასწავლო პროცესი შეწყდა

თბილისის 116-ე საჯარო სკოლაში სასწავლო პროცესი შეწყდა - მოზარდებს და პედაგოგებს შენობა სასწრაფო წესით დაატოვებინეს.

ერთი საათზე მეტია სკოლის შენობაში ადმინისტრაციის წარმომადგენლების და მშობლების შეხვედრა მიმდინარეობს.

მანამდე კი მშობლებს უთხრეს, რომ 116-ე სკოლიდან ბავშვები სხვდასხვა მიმდებარე სკოლებში გადანაწილდებიან, ივლიან ავტობუსებით და ასე მოახერხებენ მოსწავლეები სწავლის გაგრძელებას.

სკოლის ხელმძღვანელობა ამბობს, რომ მიზეზი სამხარაულის დასკვნაა, რომლის მიხედვითაც, შენობა ავარიულია და დემონტაჟს ექვემდებარება.

„საგაკვეთილო პროცესი აღდგა 15 სექტემბერს, 17 სექტემბერს მივიღეთ სამხარაულის ბიუროდან დასკვნა, სადაც აღნიშნულია, რომ შენობა გარკვეულწილად საფრთხის შემცველია, შესაბამისად, მივიღეთ გადაწყვეტილება, მოსწავლეთა უსაფრთხოების გათვალისწინებით, ისინი გადაყვანილ იქნენ ალტერნატიულ შენობაში. მოსწავლეები უზრუნველყოფილები იქნებიან ტრანსპორტის მომსახურებით და გაკვეთილები აღდგება ორშაბათიდან, არანაირი პრობლემა ამასთან დაკავშირებით არ შეექმნებათ მათ, ასევე ტრანსპორტირების მხრიდანაც“, - ამბობს სკოლის დირექტორი.

შენობის ავარიულობის ვერსიას ეჭვქვეშ აყენებენ მოზარდების მშობლები. ისინი ვარაუდობენ, რომ ტერიტორია სამშენებლო პოლიგონად უნდა გადაიქცეს და სკოლის ნაცვლად კორპუსები აშენდეს.

„რატომ გახსენეს 15 -ში და შეწყვიტეს 17-ში, თუ კი სკოლას ავტორიზაცია არ ჰქონდა გავლილი და არ იცოდნენ სკოლის მდგრადობის შესახებ, რატომ გარისკეს და რატო გახსნეს სასწავლო პროცესი. როგორ მოხდება ამ ბავშვების ტრანსპორტირება, 1200 ბავშვი სწავლობს ამ საჯარო სკოლაში, მათი გადაყვანა წერეთლის გამზირზე, ქალაქის კოლაფსს გამოიწვევს, გვპირდებიან, რომ აქ აშენდება კორპუსი. დიდუბეში, სამწუხაროდ, სკოლები აღარ არის. ამიტომ, დარწმუნებულები ვართ აქაც აშენდება კორპუსი, არ აშენდება საჯარო სკოლა და ასე ვიშლებით“, - განაცხადა მშობელმა.

116-ე სკოლაში ამ დროისთვის საგაკვეთილო პროცესი შეწყვეტილია. ადმინისტრაციის წევრები ამბობენ, რომ 1 კვირის განმავლობაში მოსწავლეები დისტანციური რეჟიმით ისარგებლებენ.

წყარო