პოლიტიკა

თავისუფლება მუსტაფა ემრე ჩაბუქს! - მთავრობის ადმინისტრაციასთან მუსტაფა ემრე ჩაბუქის მხარდასაჭერი აქცია-პერფომანსი გაიმართა

„მასწავლებლობა დანაშაული არაა“, „არ გადასცეთ ჩაბუქი თურქეთის ხელისუფლებას“, „თავისუფლება მუსტაფა ემრე ჩაბუქს“, -ამ სლოგანებით თბილისში, მთავრობის ადმინისტრაციასთან დემირელის კოლეჯის ხარისხის მართვის მენეჯერის, მუსტაფა ემრე ჩაბუქის სოლიდარობის აქცია გაიმართა.

აქციაზე შეიკრიბნენ ჩაბუქის ოჯახის წევრები, მეგობრები და მესამე სექტორის წარმომადგენლები, ასევე შავი ზღვის უნივერსიტეტის სტუდენტები და პედაგოგები.

აქციის მონაწილეებმა მოუწოდეს საქართველოს მთავრობას, არ გადასცეს ჩაბუქი თურქეთის ხელისუფლებას, ასევე მიანიჭოს მას და მის ოჯახს ლტოლვილის სტატუსი, რაც ჩაბუქის თურქეთში ექსტრადირების პროცესს შეაჩერებს.

აქციაზე პერფომანსი დაიდგა. ჩაბუქის მხარდამჭერებმა მასწავლებელი განასახიერეს, რომელიც სასწავლო პროცესს ბორკილებდადებული უძღვება.

მუსტაფა ემრე ჩაბუქის მეუღლის თუფა ჩაბუქის განცხადებით, მან უკვე შეიტანა თხოვნა ლტოლვილთა და განსახლების სამინისტროში პოლიტიკური თავშესაფრის მინიჭების თაობაზე.

„ჩემი ყველაზე დიდი სურვილია, გაიმარჯვოს სამართლიანობამ. გუშინ მოვითხოვეთ ლტოლვილის სტატუსი და იმედი გვაქვს, ჩვენს მოთხოვნას დააკმაყოფილებენ“, - განაცხადა თუფა ჩაბუქმა.

აქციის დასრულების შემდეგ ჩაბუქის მხარდამჭერები თბილისის პარლამენტთან გადაინაცვლნენ.

დემირელის კოლეჯის მენეჯერი მუსტაფა ემრე ჩაბუქი თურქეთის მოთხოვნით 24 მაისს დააკავეს.

თურქული მხარე მას ფეთჰულა გიულენის ტერორისტულ ორგანიზაციასთან თანამშრომლობაში ადანაშაულებს. თბილისის საქალაქო სასამართლომ ჩაბუქს 3-თვიანი წინასაესტრადიციო პატიმრობა შეუფარდა.

ანა მებურიშვილი