საზოგადოება

„თავისუფალი საქართველოს“ იაფი მედიკამენტების დარიგებას განაგრძობს

პარტია „თავისუფალი საქართველო“ ბაზარზე მედიკამენტების მონოპოლიური ფასების წინააღმდეგ მასშტაბურ კამპანიას აგრძელებს.

როგორც „მედიანიუსს“ პარტია „თავისუფალი საქართველოდან“ აცნობეს, პროგრამა ფართოდ მოხმარებადი მედიკამენტების მეზობელი ქვეყნებიდან იმპორტს და საქართველოს მოქალაქეებისთვის თვითღირებულებაში გადაცემას გულისხმობს. დაინტერესებული პირები წამლებს, ქართულ აფთიაქებთან შედარებით, 1/3 ფასში მიიღებენ.

პარტია „თავისუფალი საქართველოს“ ლიდერმა კახა კუკავამ, პროგრამის ფარგლებში პრეპარატი „პრესტანსი“ გოდერძიშვილების ოჯახს პირადად გადასცა. მოქალაქემ მედიკამენტი „თავისუფალი საქართველოს“ ელექტრონულ აფთიაქში 12.58 ლარად შეიძინა.

„თავისუფალი საქართველო” ამჟამად იაფი მედიკამენტების პროგრამას საპილოტე რეჟიმში ახორციელებს, რაც ერთეული მოქალაქეებისთვის მედიკამენტების საცალო, სადემონსტრაციო მიწოდებას გულისხმობს. ამასთან, 16 ოქტომბერს იწურება ვადა განცხადებაზე, რომლითაც პარტიას სსიპ სამედიცინო საქმიანობის სახელმწიფო რეგულირების სააგენტოსგან ფარმაცევტული პროდუქტის იმპორტის და რეალიზაციის ნებართვა აქვს მოთხოვნილი. შესაბამისი ნებართვის მიღების შემდეგ, „თავისუფალი საქართველო“ იაფი მედიკამენტებით მთელი ქვეყნის მასშტაბით ყველა მსურველს მოამარაგებს,“ - ნათქვამია ინფორმაციაში.