პოლიტიკა

„თავისუფალი საქართველო“ ოპოზიციას საკონსტიტუციო კომისიის ბოიკოტისკენ მოუწოდებს

პარტია „თავისუფალი საქართველოს“ განცხადებით, მას შემდეგ, რაც გამოქვეყნდა საკონსტიტუციო კომისიის შექმნის შესახებ დადგენილების პროექტი, ცნობილი გახდა, რომ მასში გარდა იმისა, რომ მონაწილეობას ვერ მიიღებს საქართველოს პრეზიდენტი, კომისიაში მიწვეული არ არიან არც არასაპარლამენტო კვალიფიციური ოპოზიციური პარტიების დიდი ნაწილი. საკონსტიტუციო კომისიაში მმართველი პარტია წარმოდგენილი იქნება 23 დეპუტატით + 7 თანამდებობის პირით, რომელიც ასევე მმართველ პარტიას წარმოადგენენ. საპარლამენტო ოპოზიცია წარმოდგენილი იქნება - 7 დეპუტატით და არასაპარლამენტო პარტიების ერთი ნაწილი - 4 პირით.

„კომისიის მუშაობაში მიწვეული არ არის საქართველოში მოქმედი 20 კვალიფიციური პარტიდან - 13, რაც პირველად ხდება დამოუკიდებელი საქართველოს ისტორიაში. არც წინა მოწვევის პარლამენტის და არც სააკაშვილის რეჟიმის პირობებში ეჭქვეშ არ დამდგარა კვალიფიციური პარტიების უფლება მონაწილეობა მიეღოთ საკონსტიტუციო რეფორმის პროცესში.

სრულიად აშკარაა რომ ივანიშვილი აპირებს კონსტიტუციურ რეფორმას არა ეროვნული თანხმობის საფუძველზე, არამედ თავისი ავტორიტარული კაპრიზების განხორციელების პროცესში ანტურაჟის შექმნას, შესაბამისად მოვუწოდებთ რეალურ ოპროზიურ პარტიებს და რეალურად დამოუკიდებელ არასამთავრობო ორგანიზაციებს:
1. გამოვუცხადოთ ბოიკოტი ივანიშვილის საკონსტიტუციო კომისიას, რომელიც წარმოადგენს მხოლოდ ანტურაჟს ავტორიტარული რეჟიმისთვის;

2. შევქმნათ ალტერნატიული საკონსტიტუიციო კომისია და მოვამზადოთ ალტერნატიული, დემოკრატიული კონსტიტუციის პროექტი, რომელიც იქნება არა ერთი ადამიანის კაპრიზების აღსრულება არამედ ფართო ეროვნული კონსესუსის შედეგი და „თამაშის წესები“ საქართველოს ყველა მოქალაქისთვის ხანგრძლივი პერიოდის მანძილზე - ისე როგორც გასული 2 საუკუნის მანძილზე ეს გააკეთეს ევროპის ცივილიზებულმა ერებმა. კომისიაში მოწვეულ უნდა იქნენ ყველა პარტია, არასამთავრობო ორგანიზაცია, მეცნიერები, უნივერსიტეტები, უმცირესობები და რელიგიური გაერთიანებები.

3. 2017 წლის გაზაფხულზე დავიწყოთ სამთავრობო პროექტის პარალელურად ალტერნატიული პროექტის საყოველთაო-სახალხო განხილვა და მოვითხოვოთ რეფერენდუმზე გატანილ იქნეს პროექტის 2-ვე ვარიანტი“, _ აცხადებს „თავისუფალი საქართველო“.