პოლიტიკა

თავისი მმართველობის პერიოდში ივანიშვილს გადაუდგამს მრავალი ნაბიჯი, რომლითაც ხეირობს ოკუპანტი სახელმწიფო - გიორგი კანდელაკი

„ევროპული საქართველოს“ ერთ-ერთი ლიდერი, გიორგი კანდელაკი გამოეხმაურა ამერიკული გამოცემა „Foreign Policy“-ის სტატიას, რომლის თანახმად, საქართველოს მთავრობამ აშშ-ის ელჩობის კანდიდატი, ბრიჯიტ ბრინქი დაბლოკა.

კანდელაკის განცხადებით, აშშ-ის მთავრობა მაინც იმას აირჩევს, ვისაც მოისურვებს, თუმცა ბრინქის კანდიდატურის შესაძლო დაბლოკვა მიანიშნებს საქართველოში პრორუსული ძალების გაძლიერებაზე.

„თავისი მმართველობის პერიოდში ივანიშვილს გადაუდგამს მრავალი ნაბიჯი, რომლითაც ხეირობს ოკუპანტი სახელმწიფო საქართველოში - ეს არის პრორუსული ძალების გაძლიერება, პროდასავლურ ოპოზიციასთან ბრძოლა. ამ ინფორმაციაში სიმართლის ნატამალი რომც იყოს, შეერთებული შტატების მთავრობა მაინც იმ პიროვნებას დანიშნავს ელჩად, ვისაც საჭიროდ თვლის.

ივანიშვილის მთავრობის მიმართ რომ ილუზიები არავის არ დარჩა ამ არჩევნების შემდეგ , საერთაშორისო ორგანიზაციების რეაქციებით, სადამკვირვებლო მისიების შეფასებებით, ვფიქრობ, ძალიან ნათლად გამოჩნდა“, - განაცხადა კანდელაკმა.

Foreign Policy-მა წყაროებზე დაყრდნობით გაავრცელა ინფორმაცია, რომ აშშ-ის მთავრობა საქართველოში აშშ-ის ელჩად სწორედ ბრინქს განიხილავდა, თუმცა საქართველოს მთავრობის რამდენიმე პირი მას მიიჩნევდა ექს-პრეზიდენტ მიხეილ სააკაშვილის მიმართ კეთილგანწყობილ ფიგურად.

გამოცემასთან რამდენიმე წყარომ გამოთქვა აზრი, რომ ამ წინააღმდეგობის უკან შესაძლოა, პარტია „ქართული ოცნების“ თავმდჯომარე ბიძინა ივანიშვილი იდგეს. Foreign Policy-მა ამ ინფორმაციის დამოუკიდებლად დადასტურება ვერ შეძლო.