პოლიტიკა

თავდაცვის მინისტრი 100-დღიან მუშაობას აჯამებს

თავდაცვის მინისტრმა ლევან იზორიამ მისი უწყების 100-დღიანი მუშაობას შეაჯამა.

იზორიამ პრეზენტაციაზე თავდაცვის სამინისტროში განხორციელებულ ინსტიტუციურ რეფორმებს გაუსვა ხაზი და აღნიშნა, რომ ამ თვალსაზრისით გადადგმული პირველი ნაბიჯი იყო საერთაშორისო პარტნიორებთან სამუშაო ჯგუფის ჩამოყალიბება.

,,თქვენ ხედავთ ჩვენს სლოგანსაც, სადაც ნათლად ჩანს, რომ ჩვენ ერთი გუნდით ერთი სტრატეგია ჩამოვაყალიბეთ. ამ გუნდში ვგულისხმობ, ჩვენ სტრატეგიულ პარტნიორებს, პირველ რიგში აშშ-ს, ნატო-ს წარმომადგენელ ქვეყნებს, თავად ნატო-ს წარმომადგენლობას.

რაც შეეხება, 100 დღის მუშაობის ანგარიშს განსაკუთრებული ყურადღება იქნა მიპყრობილი ინსტიტუციურ რეფორმებზე, კერძოდ კი, უწყებაში მიუკერძოებლობის, ოპტიმალურობის, კოორდინაციისა და აღსრულების პრინციპების რეალიზებაზე’’, - აღნიშნა ლევან იზორიამ.

მისი თქმით, მნიშვნელოვანი ცვლილებები განხორციელდა შერჩევის საბჭოს დებულებებში და ოფიცრების შერჩევის პროცესი გახდა მაქსიმალურად გამჭვირვალე და ობიექტური.

ამასთან, როგორც თავდაცვის მინისტრმა აღნიშნა, განხორციელდა სამოქალაქო ოფისის რეორგანიზაცია.

მისივე თქმით, გადაწყვეტილებების მიღების პროცესში განისაზღვრა სტატეგიული პარტნიორების მონაწილეობა.

მინისტრის განცხადებითვე, მისი უწყების სპეციფიკიდან გამომდინარე შემუშავდა უსაფრთხოების ინსტრუქციებიც.

,,შესაძლებელი გახდა ყველა იმ წვრთნების ინსტიტუციონალიზება შესაბამისი ინსტრუქციებით, სამხედრო მომზადების სტანდარტული პროცედურებით, რომელიც დაკავშირებულია ჯარისკაცის სიცოცხლესთან და ჯანმრთელობასთან’’, - განაცხადა თავდაცვის მინისტრმა.

ნინო ექვთიმიშვილი