პოლიტიკა

ტატუნაშვილის ინციდენტმა სერიოზულად დააზიანა ის ურთიერთობა, რომელიც ჩვენ ორი შეხვედრის შედეგად დავალაგეთ - გიორგი ლომია

ტატუნაშვილის ინციდენტმა სერიოზულად დააზიანა ის ურთიერთობა, რომელიც ჩვენ ორი შეხვედრის შედეგად დავალაგეთ, - განუცხადა ჟურნალისტებს პატრიოტთა ალიანსის წევრმა, გიორგი ლომიამ თბილისის საერთაშორისო აეროპორტში.

ლომია მოსკოვში გაემგზავრა, სადაც უკვე იმყოფებიან მისი თანაგუნდელები - ნატო ჩხეიძე და ადა მარშაბია.

საპარლამენტო ფრაქცია ,,საქართველსო პატრიოტების“ წარმომადგენლები რუსეთში შეხვედრებს დღეიდან დაიწყებენ. მოსკოვში პატრიოტთა ალიანსის ეს უკვე მესამე ვიზიტია, რა დროსაც დელეგაცია შეხვედრებს ისევ რუსეთის სათათბიროს წევრებთან გეგმავს.

ცნობილია, რომ ,,პატრიოტთა ალიანსის“ წევრები ოკუპანტ სახელმწიფოსთან საუბარს არჩილ ტატუნაშვილის მკვლელობისა და ოკუპირებულ ტერიტორიებზე არსებული ვითარების შესახებ გეგმავენ.

"ტატუნაშვილის ინციდენტმა სერიოზულად დააზიანა ის ურთიერთობა, რომელიც ჩვენ ორი შეხვედრის შედეგად დავალაგეთ. წინა შეხვედრაზე კულუარულად მქონდა საუბარი ამ თემაზე, დაიწყეს გამოძიება, დაეკისრა თუ არა ვინმეს პასუხისმგებლობა, ვთქვათ ოსურ მხარეს. ეხლა უკვე ამ საკითხებზე ჩვენ ოფიციალურად ვისაუბრებთ და ბუნებრივია ალბათ პასუხებსაც მივიღებთ,"-აცხადებს გიორგი ლომია.