პოლიტიკა

თამარ ჟვანიამ აუდიტის სამსახურის მიერ ცესკოში გამოვლენილი დარღვევები უარყო

ცენტრალური საარჩევნო კომისიის თავმჯდომარე თამარ ჟვანია თავის 2017 წლის ანგარიშის პრეზენტაციას აწყობს. მანამდე ის გამოეხმაურა აუდიტის დასკვნას, სადაც საუბარი იყო ცესკოში გამოვლენილ დარღვევებზე.

ჟვანიას მტკიცებით, ცესკოს არ დაურღვევია კანონი და ჰქონდა უფლება, 2016 წელს ტენდერის გამოცხადების გარეშე შეესყიდა საარჩევნო ატრიბუტიკა. აუდიტმა დაწერა, რომ ქონების ჩანაცვლების წესის დარღვევა მოხდა, როცა 1988 წელს გამოშვებული მიკროავტობუსი 2016 წელს წელს გამოშვებული „Toyota“-თი ჩანაცვლდა. ჟვანიამ დარღვევა გამორიცხა.

„პირდაპირი შესყიდვა, ჩვენ კანონით მონიჭებული უფლება გვაქვს, უბრალოდ აუდიტის დასკვნა ამახვილებს ძალიან მცირე რაოდენობრივ საკითხებზე ყურადღებას, რომელიც არის წარმოდგენილი რეკომენდაციის სახით, როგორ შეიძლება უკეთესად გავაკეთოთ“, -უთხრა ჟვანიამ ჟურნალისტებს.

ცესკოს ხელმძღვანელმა ოპოზიციის ბრალდებებსაც უპასუხა, რომ ის ხელისუფლებასთან არის გარიგებული.

„პოლიტიკურ შეფასებებზე როგორ შეიძლება ნეიტრალურმა არბიტრმა გააკეთოს რაიმე ტიპის განცხადება. ჩვენ გვაინტერესებს არა პოლიტიკური განცხადებები, არამედ გვაინტერესებს ექსპერტების, პროფესიონალების და ნეიტრალური არბიტრების განცხადებები,“- განაცხადა ცესკოს თავმჯდომარემ.