პოლიტიკა

თაკო ჩარკვიანს ქუთაისის აეროპორტში თავს დაესხნენ

პუბლიცისტ თაკო ჩარკვიანსა და მის მეუღლეს ქუთაისის აეროპორტში თავს დაესხნენ. ჩარკვიანის ინფორმაციით, მათთან 5-კაციანი ჯგუფი მივიდა. მისი თქმით, დაზუსტებით შეუძლია ამოიცნოს 4 პირი, რომელიც მას და მის მეუღლეს ფიზიკური შეურაცხყოფა მიაყენა.

ჩარკვიანის თქმით, მასსა და მის მეუღლეს აეროპორტში მყოფი ქალები იცავდნენ.

„როგორც ახლა მომაწოდეს ინფორმაცია, პრობაციონერი ვარო, ერთმა თქვა. ერთი არ იყო ფხიზელ მდგომარეობაში, მაგრამ უფრო ნასვამს არ ჰგავდა. პოლიტიკურ ნიადაგზე - აეროპორტში რომ დაგვინახეს, გვეუბნებოდნენ. მე გოგონას ვაცილებდი, თქვენ დატოვეთ ქალაქი გვეუბნებოდნენ, რომ პოლიტიკურ ნიადაგზე მიშა სააკაშვილი, რაზეც მე ვუთხარი, რომ ეს არის გაერთიანება და აქ არავითარ შუაში სააკაშვილი არ არის და გირგვლიანის დროს არ მახსოვდა არავინ ჩემს გვერდით მათი სახეებიდან. არცერთს არაფერი არ ესმოდა. აგრესია იყო ძირითადად, ჩემზე და რა თქმა უნდა, უფრო ჩემს მეუღლეზე... აქ იყო ჩვეულებრივი ცემა-ტყეპა აეროპორტში, რომ არ ყოფილიყვნენ ეს ქალბატონები, მეც პასუხისმგებლობით ვამბობ, რომ აბსოლუტურად ჩაქოლილი იქნებოდა ეს ერთი მამაკაცი,“ - უთხრა ჩარკვიანმა „კურიერს“.

ჩარკვიანის ნაამბობიდან ირკვევა, რომ მისი შვილი მის გვერდით იყო ინციდენტის დროს.

ჩარკვიანის ინფორმაციით, პოლიცია ინციდენტში არ ჩარეულა.

„არცერთი პოლიციელი არ განძრეულა. ყველაფერი მათი თანდაწრებით ხდებოდა“, - აღნიშნა ჩარკვიანმა.

მისივე თქმით, თავდასხმა პოლიტიკური ნიშნით მოხდა.

„აბსოლუტურად პოლიტიკურია. პირდაპირ გვითხრეს, ისე კი არ ვამბობ ამას, რომ ჩვენ ვართ ჩამოსულები ამის გამო, ჩვენ ამიტომ ჩამოვედით, რომ ვიცავთ რაღაცებს, უბნებს… ესენი იყვნენ ჩვეულებრივი ძველი ბიჭები“, -თქვა ჩარკვიანმა.