სამართალი

`სვეტის` ხელმძღვანელებს პატიმრობა შეეფარდათ

სამშენებლო კომპანია "სვეტის" დამფუძნებელ გივი ჯიბლაძეს და ამავე კომპანიის გენერალურ დირექტორ თორნიკე ჯანელიძეს აღკვეთის ღონისძიების სახით პატიმრობა შეეფარდათ.

მოსამართლემ სრულად დააკმაყოფილა ბრალდების მხარის შუამდგომლობა და ბრალდებულებს პატიმრობა შეუფარდა.

დაცვის მხარე კი, მოსამართლებს სთავაზობდა, რომ ბრალდებულების მიმართ გირაო გამოეყენებინა.

ცნობისთვის, სამშენებლო კომპანია "სვეტის“ დამფუძნებელი გივი ჯიბლაძე და ამავე კომპანიის დირექტორი თორნიკე ჯანელიძე ფინანსთა სამინისტროს საგამოძიებო სამსახურმა 3 ოქტომბერს დააკავა.

საგამოძიებო უწყების ინფორმაციით, „სვეტის“ ხელმძღვანელი პირების მიმართ გამოძიება დეველოპერული კომპანია „სვეტის“ მენაშენეთა ერთობლივი განცხადების საფუძველზე დაიწყო.

საგამოძიებო უწყების ინფორმაციით, გამოძიებით დადგინდა, რომ მხოლოდ ერთ ობიექტზე, ბრალდებულები გივი ჯიბლაძე და თორნიკე ჯანელიძე მოტყუებით დაეუფლნენ მენაშენეთა კუთვნილ თანხას 3 356 385 ლარის ოდენობით.