სამართალი

სუს-ის მიერ დაკავებული ანატოლი ბერძენიშვილი დუმილის უფლებას იყენებს

სახელმწიფო უსაფრთხოების სამსახურის მიერ დაკავებული ანატოლი ბერძენიშვილი დუმილის უფლებას იყენებს, - განუცხადა ჟურნალისტებს დაკავებულის ადვოკატმა, ელდარ გვალიამ.

მისი თქმით, დაკავებულს ჯერ ბრალი ოფიციალურად არ წარდგენია.

როგორც ადვოკატი ამბობს, მისთვის ასევე უცნობია საქმის მასალები. სავარაუდოდ, ბრალის წარდგენა დღეს, დღის პირველ ნახევარში მოხდება, რის შემდეგაც აღკვეთის ღონისძიების შესახებ სასამართლო პროცესი ჩაინიშნება.

გვალიას ინფორმაციით, დაკავების ოპერაცია თბილისში, ბრალდებულის სახლში ჩატარდა.

ცნობისათვის, სახელმწიფო უსაფრთხოების სამსახურის კონტრტერორისტულმა დეპარტამენტმა გუშინ, სასამართლოს განჩინების საფუძველზე, თბილისში, საქართველოს მოქალაქე ანატოლი ბერძენიშვილი დააკავა.

სუს-ის ინფორმაციით, გამოძიების ამ ეტაპზე დადგენილია, რომ დაკავებული ანატოლი ბერძენიშვილი ჩავიდა თურქეთში ახმედ ჩატაევის და მისი დაჯგუფების წევრების დასახმარებლად. დაკავებულმა, ზურაბ გორნაკაშვილთან და ზურაბ იდოიძესთან ერთად, ახმედ ჩატაევს და მისი დაჯგუფების წევრებს დახმარება გაუწია თურქეთ-საქართველოს საზღვართან, კირნათი-მარადიდის მწვანე ზოლის მონაკვეთამდე გადაადგილებაში.

გამოძიება საქართველოს სსკ-ის 331- ე პრიმა მუხლის მესამე ნაწილით მიმდინარეობს, რაც ტერორიზმის დაფინანსებას, ტერორისტული საქმიანობის სხვაგვარ მატერიალურ მხარდაჭერას ან რესურსებით უზრუნველყოფას გულისხმობს, რამაც მძიმე შედეგი გამოიწვია. დანაშაული სასჯელის ზომად 17-დან 20-წლამდე ვადით ან უვადო თავისუფლების აღკვეთას ითვალისწინებს.