პოლიტიკა

სურთ გადაიტანონ პარლამენტი, რაც თბილისში საცობების და ხალხის გაღიზიანების მეტს არაფერს გამოიწვევს - გრიგოლ ვაშაძე

გაერთიანებული ოპოზიციის „ძალა ერთობაშია“ პრეზიდენტობის კანდიდატმა გრიგოლ ვაშაძემ მხარდამჭერებთან ერთად პარლამენტის ქუთაისიდან თბილისში გადატანა გააპროტესტა.

„დღეს, გაერთიანებულ ოპოზიციას აქვს პატივი, იდგეს ამ შენობის წინ, რომელიც თანამედროვე ქართული სახელმწიფოს სიმბოლო გახდა და ეს შენობა გახდება „ქართული ოცნების" კიდევ ერთი სიცრუისა და ქუთაისელებისადმი ზიზღის სიმბოლო. პარლამენტის ადგილი არის ქუთაისი. ახლა რეგლამენტში შეაქვთ ცვლილება და სურთ გადაიტანონ პარლამენტი, რაც თბილისში საცობების და ხალხის გაღიზიანების მეტს არაფერს გამოიწვევს. ცდილობენ, ქუთაისს წაართვან სოციალური სტატუსი და როლი, რომელიც მას ისტორიულად ეკუთვნის. არავითარ შემთხვევაში ამას არ დავუშვებთ. გგონიათ რეგლამენტში ცვლილების შეტანით გადაიტანთ? ვერ გადაიტანთ, იმიტომ რომ თქვენ ძალიან მალე ხელისუფლებაში აღარ იქნებით. ამის გარანტი ქუთაისელები არიან. თქვენ ისტორიულ დედაქალაქს ექცევით ისე, როგორც პროვინციულ პატარა ქალაქს", -განაცხადა ვაშაძემ.

გაერთიანებულმა ოპოზიციამ პარლამენტის ქუთაისში დარჩენის მოთხოვნით აქციები დააანონსა.

გუშინ პარლამენტმა მიიღო გადაწყვეტილება, რომლის მიხედვითაც, რეგლამენტში შედის ცვლილებები, რაც პარლამენტის თბილისში გადატანას გულისხმობს.