სამართალი

სპორტის სასახლეში ადვოკატთა ასოციაციის თავმჯდომარის არჩევნები მიმდინარეობს

დარწმუნებული ვარ, ადვოკატთა ასოციაცია დღეს ჩაატარებს დემოკრატიულ, ურთიერთპატივისცემაზე დაფუძნებულ არჩევნებს და გაიმარჯვებს ჩვენი ერთიანობისა და დამოუკიდებლობის პრინციპი, - განაცხადა ადვოკატთა ასოციაციის თავმჯდომარეობის კანდიდატმა, დავით ასათიანმა სპორტის სასახლეში, სადაც ასოციაციის თავმჯდომარის არჩევნების პროცედურები 10:00 საათიდან მიმდინარეობს.

"ჩვენ გვაქვს მოსაზრებები და იდეები, რომ გავაძლიეროთ ჩვენი დამოუკიდებლობა - უფრო თვითმმართველი და აპოლიტიკური ორგანიზაცია გახდეს ადვოკატთა ასოციაცია. დარწმუნებული ვარ, კოლეგების მხარდაჭერაში იმიტომ, რომ ჩვენს ერთიანობას, ჩვენს დამოუკიდებლობას, ჩვენს თვითმმართველობას ალტერნატივა არ გააჩნია", - განაცხადა დავით ასათიანმა.

ადვოკატთა ასოციაციის თავმჯდომარეობის კანდიდატი ოპონენტების პრეტენზიებსაც გამოეხმაურა და აღნიშნა, რომ არჩევნებამდე რამდენიმე დღით ადრე გამოთქმული პრეტენზიები ემსახურებოდა მხოლოდ და მხოლოდ არჩევნების წინა აურზაურს და ამ პრეტენზიებს სერიოზული საფუძვლები არ გააჩნია.
მისი თქმით, არანაირ პოლიტიკურ თამაშებსა და სახელისუფლების ბრძოლაში მონაწილეობას არ მიიღებს და მისი თავმჯდომარეობის პირობებში ეს გამორიცხული იქნება.

"პირველ რიგში, ყველას მეგობრობის ხელს გავუწვდი მიუხედავად შედეგებისა. მიუხედავად, გარკვეული არასამართლიანი პრეტენზიებისა, რომელიც წინასაარჩევნოდ გაისმა ჩვენი გუნდისა და ჩემი მისამართით, ჩვენ ეს დავიწყებული გვაქვს", - განაცხადა დავით ასათიანმა.

ადვოკატთა ასოციაციის თავმჯდომარეობის არჩევნებში სულ 12 კანდიდატი მონაწილეობს, მათ შორის არიან - დავით ასათიანი, იასონ ბესელია, გრიგოლ გაგნიძე, დავით ებრალიძე, ალექსი კობაიძე, დავით ლანჩავა, ონისე მარგიანი, ვასილ ოსეფაშვილი, ელგუჯა ჩხაიძე, ირმა ჭკადუა, ლევან ჯანაშია და ვაჟა ჯაოშვილი.