სამართალი

სომხეთის ციხეში მყოფი საქართველოს მოქალაქე ექსტრადირების პროცედურების დაჩქარებას ითხოვს

საქართველოს მოქალაქე ავთანდილ მარტიაშვილი, რომელიც სომხეთის საპატიმროში იხდის სასჯელს, ჯანმრთელობის მდგომარეობის გაუარესების გამო, საქართველოში თავისი ექსტრადირების პროცედურების დაჩქარებას ითხოვს.

მარტიაშვილი, რომელსაც ე.წ. ჰეროინის საქმეზე, 17 წლით პატიმრობა მიუსაჯეს, ,,პირველ არხს“ დაუკავშირდა და დახმარება ითხოვა.

„იქნებ, როგორმე ხმა მიაწვდინოთ საქართველოს პროკურატურას, უკვე ოთხი თვეა, სომხეთის მხარემ გადმოუგზავნა საბუთები ექსტრადირების შესახებ, რასაც საქართველოდან არავითარი რეაგირება არ მოჰყოლია. ჯანმრთელობა ძალიან გაუარესებული მაქვს. დიაბეტის გამო, განგრენა მეწყება. არავითარ ყურადღებას არ მაქცევენ. ერთი წელი, საავადმყოფოში ვწევარ“, – აცხადებს მარტიაშვილი.

,,პირველი არხის“ ინფორმაციით, ავთანდილ მარტიაშვილი საქართველოში რეგისტრირებულმა თურქულმა კომპანიამ მძღოლად დაიქირავა. 2013 წელს, ერთ-ერთი გადაზიდვის დროს, სომხეთ-ირანის საზღვარზე, მარტიაშვილის ავტომობილი გააჩერეს და მასში ერთ ტონამდე ჰეროინი აღმოჩნდა. მარტიაშვილი ადგილზე დააკავეს, მისი დამქირავებელი თურქეთის მოქალაქე ოსმან უღურლუ კი, მიიმალა. მალევე, ისიც დააკავეს და ბრალი აღიარა. ასევე, ითქვა, რომ ქართველმა მძღოლმა ნარკოტიკის არსებობის შესახებ არ იცოდა. მიუხედავად ამისა, მარტიაშვილს 17 წლით თავისუფლების აღკვეთა მიესაჯა.

საქართველოს იუსტიციის სამინისტროში აცხადებენ, რომ პატიმრის ექსტრადირებისთვის საჭირო პროცედურები უკვე მიმდინარეობს.

ნინო ექვთიმიშვილი