პოლიტიკა

სოფო ხორგუანი პარლამენტში სალომე ზურაბიშვილის ადგილის დაკავებას შეეცდება

სახალხო დამცველის ყოფილი მოადგილე სოფო ხორგუანი პარლამენტის დეპუტატობისთვის ბრძოლას აპირებს და მთაწმინდაზე შუალედურ არჩევნებში მონაწილეობას გეგმავს. ეს ადგილი პარლამენტში ვაკანტური მას შემდეგ გახდა, რაც მთაწმინდის მაჟორიტარი სალომე ზურაბიშვილი საქართველოს პრეზიდენტად იქნა არჩეული.

თავისი გადაწყვეტილების შესახებ ხორგუანმა დღეს გამართულ პრესკონფერენციაზე ისაუბრა.

ხორგუანის თქმით, ის კენჭს დამოუკიდებელ კანდიდატად იყრის და გადაწყვეტილებაც დამოუკიდებლად, რომელიმე პოლიტიკურ პარტიასთან კონსულტაციის გარეშე მიიღო.

„2012 წლის შემდეგ პოლიტიკაში პირდაპირი მონაწილეობა არ მიმიღია. 28 ოქტომბერს აღმოვაჩინე ის რეალობა, რომ ისევ იქ ვართ, საიდანაც დავიწყეთ ბრძოლა 2012 წელს. ადამიანები, რომლებიც მოვიდნენ ხელისუფლებაში და სურდათ ამ ქვეყანაში არსებული ვითარება შეეცვალათ, ვერ გაართვეს თავი საქმეს ისე, როგორც ამას მათგან ამომრჩეველი ელოდებოდა. ნიჰილიზმის განცდა და დეპრესია, რომელიც არსებობს ჩვენს საზოგადოებაში, დამთრგუნველია. ჩემი გამოცდილებით შევძლებ ხელისუფლება უფრო მეტად ავამუშაო. მე ვიცი, როგორ უნდა მუშაობდეს სახელმწიფო სისტემა, როგორ უნდა მუშაობდეს ხელისუფლება და დღეს არსებული კანონმდებლობით, არის თუ არა შესაძლებელი ვითარება უკეთესობისკენ დღესვე შეიცვალოს,” – განაცხადა სოფო ხორგუანმა.