სამართალი

სოფელ ფოკაში, 33 წლის მამაკაცის მკვლელობაში ბრალდებულს სახლი და ავტომობილები დაუწვეს

ნინოწმინდის მუნიციპალიტეტის სოფელ ფოკაში, 33 წლის მამაკაცის მკვლელობაში ბრალდებულს მოკლულის თანასოფლელებმა და ახლობლებმა ღამით სახლი და ავტომობილები დაუწვეს. შსს-ის ცნობით, დამწვარია სახლი, სათავსო და ორი ავტომობილი.

უწყების განცხადებით, მკვლელობაში ბრალდებულის ოჯახის წევრების უსაფრთხოება უზრუნველყოფილია და არავინ არ დაშავებულა.

გადაწვის ფაქტთან დაკავშირებით შსს-მ გამოძიება სსკ-ის 187–ე მუხლის მეორე ნაწილით დაიწყო, რაც სხვისი ნივთის დაზიანებას ან განადგურებას გულისხმობს და ითვალისწინებს 3-დან 5 წლამდე თავისუფლების აღკვეთას.

მკვლელობა ფოკაში გუშინ მოხდა. შსს-ის სამცხე-ჯავახეთის პოლიციის დეპარტამენტის თანამშრომლებმა 1985 წელს დაბადებული ხ.ტ.-ის განზრახ მკვლელობის ფაქტი გახსნეს, დაკავებულია ერთი პირი.

უწყების ცნობით, ჩადენილი დანაშაული 7-დან 15 წლამდე თავისუფლების აღკვეთას ითვალისწინებს. სამართალდამცველებმა გაარკვიეს, რომ მკვლელობაში ბრალდებულმა, 1986 წელს დაბადებულმა გ.მ.-მ წარსულში არსებული პირადი კონფლიქტის გამო, შურისძიების მოტივით, თანასოფლელი - ხ.ტ. ცეცხლსასროლი იარაღიდან გასროლით მოკლა. პოლიციამ გ.მ. მომხდარიდან რამდენიმე საათში, ნინოწმინდის რაიონში დააკავა. გ.მ.-მ ჩადენილი დანასაული აღიარა.

შსს-ის ინფორმაციით, გამოძიება განზრახ მკვლელობის ფაქტზე, საქართველოს სისხლის სამართლის კოდექსის 108-ე მუხლით მიმდინარეობს.