სამართალი

სმიტების ოჯახის მკვლელობაში ბრალდებულის ადვოკატი მოითხოვს, ყველა ექსპერტიზა ამერიკულმა მხარემ ჩაატაროს

აშშ-სა და საქართველოს მოქალაქეების, სმიტების ოჯახის მკვლელობაში ბრალდებულის ადვოკატი დავით გირგვლიანი უნდობლობას უცხადებს საქართველოს პროკურატურის მიერ ჩატარებულ გამოძიებას და მოითხოვს ყველა ექსპერტიზა ამერიკულმა მხარემ ჩაატაროს.

ადვოკატს აშშ-ს ფედერალური ბიუროს გამომძიებლებთან შეხვედრა სურს.

როგორც დავით გირგვლიანმა დღეს, მედიაცენტრ “მთავარში” გამართულ პრესკონფერენციაზე განაცხადა, მზად არის დებატებში გამოიწვიოს საქმის პროკურორი და გამოძიებასთან დაკავშირებით, ყველა საკითხთან დაკავშირებით შესაბამისი განმარტებები გააკეთოს.

,,ჩემი დაცვის ქვეშ მყოფის მიმართ, უდანაშაულობის პრეზუმციის დარღვევის მოწმეები გავხდით. ქართულ გამოძიებას თავად ჩვენი მოქალაქეები არ ენდობიან და ეს დაადასტურა ხორავას ქუჩის საქმემ. საიდან აღმოჩნდა ის ორი უცნობი ადამიანი ხადას ხეობაში, სად წავიდა ის შავი ავტომობილი, რომლის შესახებაც საუბრობს მკვლელობაში ბრალდებული კობაური. ამის გამოსაძიებლად არაფერი გააკეთდა“, –აცხადევს ადვოკატი დავით გირგვლიანი.

მისივე თქმით, არსებობენ თვითმხილველები, რომლებმაც ხეობაში შავი ჯიპი დაინახეს.

„ჩემი დაცვის ქვეშ მყოფი ხადას ხეობაში ყველაზე მეტად დაჩაგრული ადამიანი იყო. ის იყო ადვილად ხელში ჩასაგდები და დასაჩაგრი, ვისზეც ძალიან მარტივი იქნებოდა, ხელების შეწმენდა. არსებობენ ადამიანები, ვინც შავი ავტომობილი დაინახა. ისინი ამ ეტაპისთვის დაკითხულები არ არის. იცით, რომ საქმეში ჩაერთო ფედერალური ბიურო და ისინი გამოძიებას იქიდან კი არ დაიწყებენ, სადაც ქართული გამოძიება გაჩერდა, ისინი დაიწყებენ თავიდან. ამიტომ, არ მინდა გარემოებების ნაადრევი გასაჯაროებით მათ ხელი შევუშალო. დაელოდეთ ობიექტურ ჭეშმარიტებას“, – აღნიშნა ადვოკატმა მედიაცენტრ „მთავარში“.