სამართალი

სკოლის ყოფილი დირექტორმა სასამართლოს პირველ ინსტანციაში განათლების სამინისტროს დავა მოუგო - უწყებას 20 000-ლარიანი კომპენსაციის გადახდა დაევალა

მარიამ რამინაშვილმა სასამართლოს პირველ ინსტანციაში განათლების სამინისტროს დავა მოუგო. 53-ე საჯარო სკოლის ყოფილი დირექტორი 2014 წლის 7 აპრილს მისი გათავისუფლების შესახებ თამარ სანიკიძის გადაწყვეტილებას ასაჩივრებდა. სასამართლოს გადაწყვეტილებით, ბათილად გამოცხადდა მარიამ რამინაშვილის გათავისუფლების გადაწყვეტილება და სამინისტროს კომპენსაციის სახით 20 ათასი ლარის გადახდა დაევალა.

„სასამართლომ მიიღო გადაწყვეტილება, რომ ბათილად იქნას გამოცხადებული მინისტრის 2014 წლის გადაწყვეტილება ჩემს გათავისუფლებასთან დაკავშირებით, მათ შორის სამინისტრომ კომპენსაცია უნდა გამომიყოს“, -განაცხადა რამინაშვილმა.

გათავისუფლების ოფიციალურ მიზეზად აუდიტის დასკვნა დასახელდა, თუმცა თავად რამინაშვილი დღემდე ამბობს, რომ მოტივი პოლიტიკური იყო.

„მიზეზი იყო იმდენად უმნიშვნელო, რომ ამაზე საუბარი მაშინვე შეწყდა, უბრალოდ შემოიფარგლებოდა სამინისტრო, რომ უხეში დარღვევები იყო და არასდროს არ აკონკრეტებდა ამას, თუმცა მაშინაც ვამბობდი და დღესაც დავადასტურე, რომ ეს იყო პოლიტიკური ნიშანი“, -თქვა რამინაშვილმა.