სამართალი

,,სიტროენ ჯორჯიას“ საქმის მასალები პრემიერის აპარატში შეაქვს

კომპანია ,,სიტროენ ჯორჯიასთან“ დაკავშირებული დავა, რომლის გამოც პრემიერ-მინისტრი დებს პირობას, რომ მთავრობის დანაშაულის გამოკვეთის შემთხვევაში თანამდებობას დატოვებს, გრძელდება.

მომღერალ გიორგი გაჩეჩილაძის ბრალდების გასამყარებლად ,,სიტროენ ჯორჯიას“ მენეჯერებმა გადაწყვიტეს პრემიერის აპარატს საქმის მასალები მიაწოდონ. ისინი ადმინისტრაციაში დოკუმენტებს დღეს წარადგენენ.

სწორედ ,,სიტროენ ჯორჯიას“ იურისტები და გია გაჩეჩილაძე საუბრობდნენ, რომ მთავრობა კერძო კომპანიებთან კაბალურ გარიგებაშია. მაგალითად კი, დასახელდა ჯანდაცვის სამინისტროს ტენდერი, რომელიც სასწრაფო დახმარების მანქანების შესყიდვას შეეხებოდა.

როგორც ,,სინტროენ ჯორჯიას“ იურისტი განმარტავს, პრემიერის აპარატში დოკუმენტაციის შეტანის გადაწყვეტილება მიღებული იყო იქიდან გამომდინარე, რომ კომპანიის ხელმძღვანელობის შეფასებით, გიორგი კვირიკაშვილის გუშინდელი განცხადება იყო ნაჩქარევი და მთავრობის მეთაურს არ აქვს ინფორმაცია აღნიშნულ საქმესთან დაკავშირებით.

,,ეს განცხადება იყო აშკარად ნაჩქარევი, მიკერძოებული. ალბათ, მას ჰყავს ძალიან ცუდი მრჩევლები. ჩვენ მაინც შევიტანთ ამ მასალებს, რათა პრემიერ-მინისტრი და მისი მრჩევლები დარწმუნდნენ იმაში, რომ ,,სიტროენ ჯორჯიას“ ბრალდებები და საჩივრები არის საფუძვლიანი“, - განაცხადა ადვოკატმა გიორგი კორძახიამ.

მისივე ინფორმაციით, მოვლენების ფონზე ,,სიტროენის“ სათაო ოფისში საფრანგეთში გაკეთდა განცხადება, რომ კომპანია საქართველოს დატოვებს.

ნინო ექვთიმიშვილი