სამართალი

სისხლის სამართლის მუხლი, რომელიც 0,00009 გრამ დეზომორფინზე თავისუფლების აღკვეთას ითვალისწინებდა, საკონსტიტუციო სასამართლომ ძალადაკარგულად ცნო

საქართველოს საკონსტიტუციო სასამართლოს პირველმა კოლეგიამ „თეთრი ხმაურის მოძრაობის“ სარჩელი საქმეზე „ლაშა ბახუტაშვილი საქართველოს პარლამენტის წინააღმდეგ“ დააკმაყოფილა.

მიღებული გადაწყვეტილებით, ძალადაკარგულია საქართველოს სისხლის სამართლის კოდექსის 260-ე მუხლის მე-3 ნაწილის ის ნორმატიული შინაარსი, რომელიც ითვალისწინებს სისხლის სამართლებრივი სასჯელის სახით თავისუფლების აღკვეთის გამოყენების შესაძლებლობას 0,00009 გრამი ნარკოტიკული საშუალება - დეზომორფინის დამზადების, შეძენისა და შენახვისთვის საქართველოს კონსტიტუციის მე-17 მუხლის მე-2 პუნქტთან მიმართებით.

ლაშა ბახუტაშვილი 2013 წელს დააკავეს 0,00009 გრ. (მოხმარებულ ნემსში არსებული ნარჩენისთვის) ნარკოტიკული საშუალება დეზომორფინის შეძენა-შენახვის ბრალდებით. იმის გამო, რომ დეზომორფინის მცირე რაოდენობა კანონით დადგენილი არ არის, 0.00009 გრ. დიდ ოდენობად მიიჩნევა.