საზოგადოება

სისხლიანი გარჩევა თბილისში - მოკლულია 2 მამაკაცი, ხოლო კიდევ 2 დაჭრილია

გვიან ღამით თბილისში წავკისელის ქუჩის 6 ნომერთან მომხდარი დაპირისპირების შედეგად ორი ახალგაზრდა მამაკაცი მოკლეს, ორი კი დაჭრეს.

მოკლულები ბიძაშვილები - 26 წლის ლექსო და 28 წლის დავით ფეიქრიშვილები არიან. ერთ-ერთი მათგანი ადგილზე დაიღუპა, მეორე კი საავადმყოფომდე მიყვანამდე გარდაიცვალა.

ერთ-ერთი დაჭრილი კლინიკა "პინეოშია" მოთავსებული. ზურგში ბასრი იარაღით მიყენებული ჭრილობის გამო მას სასწრაფო ოპერაცია დასჭირდა. ექიმების თქმით, პაციენტის სიცოცხლეს საფრთხე არ ემუქრება.

„დაზიანება იყო მიყენებული ბასრი დანით მე-11-მე-12 ნეკნებს შუა. ჭრილობა არ იყო შემავალი, დამუშავდა ჭრილობა. ამჟამად პაციენტი არის რეანიმაციულ განყოფილებაში, სტაბილურადაა“, - განაცხადა ექიმმა ნიკა გავაშელაშვილმა.

ამ დრომდე დაუდგენელია კიდევ ერთი დაშავებულის ადგილმდებარეობა. უცნობია სისხლიანი გარჩევის მიზეზიც. პოლიცია დამნაშავეებს ეძებს. სამართალდამცველები წავკისელის ქუჩაზე თითქმის მთელი ღამის განმავლობაში მუშაობდნენ.