პოლიტიკა

სირიის გადაწყვეტილება მოულოდნელი არ ყოფილა, რადგან ბაშარ ასადი დღეს რუსეთის წაქეზებით მოქმედებს - ჰიზერ ნაუერტი

სირიის მიერ ოკუპირებული აფხაზეთისა და ცხინვალის რეგიონის დამოუკიდებლობის აღიარებას აშშ-ის სახელმწიფო დეპარტამენტი გამოეხმაურა. უწყების პრესსპიკერის, ჰიზერ ნაუერტის განცხადებით, ეს გადაწყვეტილება მოულოდნელი არ ყოფილა, რადგან დამასკმა ეს რუსეთის ზეწოლის გამო მიიღო.

მან ასევე აღნიშნა, რომ ვაშინგტონი მხარს უჭერს საქართველოს ტერიტორიულ მთლიანობას, ხოლო ასადის გადაწყვეტილება ვერაფერს ვერ შეცვლის.

„ასადის რეჟიმის მიერ საქართველოს რეგიონების აფხაზეთისა და სამხრეთ ოსეთის აღიარება მოულოდნელი არ ყოფილა, რადგან ბაშარ ასადი დღეს რუსეთის წაქეზებით მოქმედებს. რუსეთის მიერ ოკუპირებული რეგიონები აფხაზეთი და ცხინვალი საქართველოს შემადგენელი ნაწილებია. აშშ-ი აგრძელებს საქართველოს დამოუკიდებლობის, სუვერენიტეტისა და ტერიტორიული მთლიანობის მხარდაჭერას საერთაშორისოდ აღიარებულ საზღვრებში. ასადის რეჟიმის გადაწყვეტილება ვერაფერს ვერ შეცვლის“, – თქვა ნაუერტმა.

გუშინ გახდა ცნობილი, რომ სირიამ რუსეთის მიერ ოკუპირებული აფხაზეთისა და სამხრეთ ოსეთის დამოუკიდებლობა აღიარა. ამის საპასუხოდ საქართველომ სირიასთან დიპლომატიური ურთიერთობების გაწყვეტის გადაწყვეტილება მიიღო.

ოკუპირებული აფხაზეთისა და სამხრეთ ოსეთის ე.წ. დამოუკიდებლობა სირიის გარდა ასევე აღიარეს რუსეთმა, ნიკარაგუამ, ვენესუელამ , ნაურუმ, ვანუატუმ და ტუვალუმ.