საზოგადოება

სიმღერა ოპერის წინ ან როგორ გავარჩიოთ ხელოვანი და ხულიგანი - 10 თებერვლის ქრონიკა

მწერალი როსტომ ჩხეიძე სოციალურ ქსელში წერს:

„გახსოვთ თენგიზ ჩანტლაძის ის სკეტჩი: „მილიციაში“ - ახალგაზრდებს რომ მიუყვანენ:

ოპერის წინ მღეროდნენ ღამით, როცა მშვიდობიან მოსახლეობას მშვიდად ეძინაო!..

და მილიციის განყოფილების უფროსიც შავ დღეს აყრით:

რატომ ხულიგნობთ, რატომ მღეროდით ოპერის წინ, თუ ვაჟკაცები ხართ, ოპერაში შესულიყავით და იქ გემღერათ, მაგრამ ეტყობა საოპერო სიმღერები არ გეხერხებათ, კამერული უფრო გეხერხებათ და აგერ მაქვს თქვენთვის კამერებიო.

ეს ჩანაწერი რამდენჯერაც უნდა ნახო, იმდენჯერ გეცინება, მითუმეტეს, როდესაც ყველაფერი კეთილად მთავრდება და მილიციის უფროსი იმ რიგით ჯამასპიშვილს შეაგდებინებს კამერაში, ეს ახალგაზრდები ვინც მოიყვანა:

მაგას ხელოვანი და ხულიგანი ვერ გაურჩევია, სიმღერა თუ ხულიგნობა ჰგონია, ცეკვა სულაც ბანდიტიზმი ეგონებაო!..

ისე მოხდებოდა, რომ:

პაატა ბურჭულაძესაც ოპერის წინ მოუწევს სიმღერა, რაკიღა ოპერაში არაფრისდიდებით არ უშვებენ.

და რა გაგვიკვირდეს:

თუ სიმღერას ხულიგნობად ჩაუთვლიან და ჩვენებური პოლიციის განყოფილებაშიც მიიყვანენ, სადაც თენგიზ ჩანტლაძის პერსონაჟის საპირისპირო სულისა და მორალის უფროსი დახვდება განრისხებული:

ოპერის წინ რომ მღერი, თუ ვაჟკაცი ხარ, ოპერაში შესულიყავი და იქ გემღერა, მაგრამ ეტყობა შენ საოპერო სიმღერა არ გეხერხება, კამერული უფრო გეხერხება და მაქვს შენთვის აგერ პირველი კამერაო.

და თუ ჩვენებური სასამართლოც ექვსთვიან სანატორიუმს გამოუწერს...

რაც თენგიზ ჩანტლაძისათვის ირონიისა და სარკაზმის საგანი გახლდათ, ამათთვის რეალობად გადაქცეულა:

სიმღერა ხულიგნობა ჰგონიათ და ცეკვა - ბანდიტიზმი!..

სხვაგვარად ანკი როგორ იქნებოდა:

როდესაც ასე გადაწვნია საპროტესტო მანიფესტაციებს სიმღერა და ცეკვა... ცეკვა და სიმღერა...

და მღერის, მღერის, მღერის პაატა ბურჭულაძე... ჯერ მაინც ოპერის წინ!“