პოლიტიკა

სიის გასვლა-არგასვლა კი არ არის მთავარი, არამედ ის, რომ მურუსიძე-ჩინჩალაძის კლანს არ დარჩება სასამართლო - სერგი კაპანაძე

„ევროპული საქართველოს“ ერთ-ერთმა ლიდერმა სერგი კაპანაძემ იუსტიციის უმაღლესი საბჭოს მიერ წარდგენილი მოსამართლეთა 10-კაციან სიასთან მიმდინარე ამბების შეფასებისას განაცხადა, რომ მნიშვნელოვანია, სასამართლო მურუსიძე-ჩინჩალაძის კლანს არ დარჩეს.

დეპუტატის თქმით, ის ამ ეტაპზე მმართველი პარტიისგან ვერ ხედავს პოლიტიკურ მზაობას, რომ აღნიშნული 10-კაციანი სია არ დამტკიცდეს.

კაპანაძის განმარტებით, „ქართული ოცნების“ წევრები მხოლოდ კრიტერიუმების შეცვლაზე საუბრობენ და არ აფიქსირებენ ღიად პოზიციას, რომ სასამართლო სისტემა მურუსიძის კლანისგან გათავისუფლდება. მან ეჭვი გამოთქვა, რომ განახლებული კრიტერიუმები ისევ ამ მოსამართლეებს მოერგება.

„არცერთ ეტაპზე არც ივანიშვილისგან, არც კობახიძისგან და არც „ქართული ოცნების“ მესვეურებისგან ჩვენ არ მოგვისმენია პოლიტიკური ნების გამოხატვა, რომ ეს სია არ გავა, უფრო სწორად, სიის გასვლა-არგასვლა კი არ არის მთავარი, არამედ ის, რომ მურუსიძე-ჩინჩალაძის კლანს არ დარჩება სასამართლო. ამაზე საუბარი ჩვენ არ მოგვისმენია, ჩვენ მოვისმინეთ რაღაც ტექნიკურ დეტალებზე, რომ კრიტერიუმები იქნება დამუშავებული იმ მიზნით, როგორც ჩანს, რომ ამ სიაში არსებული მოსამართლეების დიდი ნაწილი ახალ კრიტერიუმებს მოარგონ და უფრო უკეთ იყოს გამართლებული ამ ხალხის უზენაეს სასამართლოში უვადოდ გამწესება. საუბარია მოსამართლეებზე, რომლებიც ბოლო 7 წლის განმავლობაში ჩვეულებრივი ყურმოჭრილი მონები იყვნენ ივანიშვილის და მის ყველა დავალებას ასრულებდნენ. აქედან გამომდინარე, ამ ადამიანებისთვის სასამართლოს ხელში ჩაგდება არის დამღუპველი ჩვენი ქვეყნისთვის“, - განაცხადა კაპანაძემ