პოლიტიკა

შვილმოკლულ მამებთან მივედი არა როგორც პოლიტიკოსი, არამედ როგორც ადამიანი, რომელსაც თანაგრძნობის უნარი აქვს - ნინო ბურჯანაძე

„დემოკრატიული მოძრაობის“ ლიდერი, ნინო ბურჯანაძე გამოეხმაურა მის მიმართ გამოთქმულ შეფასებას, რომელიც რუსთაველზე ზაზა სარალიძესთან და მალხაზ მაჩალიკაშვილთან მისი და ბადრი ბიწაძის მისვლას მოჰყვა.

ბურჯანაძის მტკიცებით, ეს ნაბიჯი მან გადადგა არა როგორც პოლიტიკოსმა, არამედ როგორც თანაგრძნობის უნარის მქონე ადამიანმა.

„არ ვაპირებ, ვინმესთან თავი ვიმართლო, თუ რატომ მივედი ზაზა სარალიძესთან და მალხაზ მაჩალიკაშვილთან. მე იქ მივედი არა როგორც პოლიტიკოსი, არამედ როგორც ადამიანი, რომელსაც თანაგრძნობის უნარი აქვს. მე იქ მივედი, როგორც დედა, რომელსაც შვილები ჰყავს. რა შუაშია „ნაციონალური მოძრაობა“, ადამიანებს შვილები მოუკლეს და ეს ხელისუფლება დამნაშავეებს ხელს აფარებს. ამ თემაზე თავის მართლებას არ ვაპირებ, თუ ვინმეს არ ახსოვს, მინდა შევახსენო, ჩვენ ვართ ის ერთადერთი ძალა, რომელიც არასოდეს არ გავრიგებულვართ არავის არც ხელისუფლებაში და არც ოპოზიციაში, არასოდეს არავისთან ვაჭრობა არ დაგვიწყია, ყოველთვის ვიცავდით ჩვენს პოზიციას და ყოველთვის სიმართლეს ვეუბნებოდით ჩვენს საზოგადოებას. ჩვენი მომხრეები და ობიექტურად მოწინააღმდეგეები ხედავენ, ჩვენ რასაც ვამბობთ, იმას ვაკეთებთ. მე და ჩემი გუნდი ყოველთვის შევეწინააღმდეგებით უსამართლობას, დამნაშავეებზე ხელის გადაფარებას, ადამიანების აბუჩად აგდებას. ვინც არ უნდა იყოს, არავის არ მივცემთ უფლებას ცილისწამებითა და ტალახის სროლით შეგვაშინოს და დაგვადუმოს“, - განაცხადა ბურჯანაძემ.