სამართალი

შსს-ს ვუცხადებ უნდობლობას - დავით კირკიტაძე

„ნაციონალური მოძრაობის“ წევრმა, დავით კირკიტაძემ შსს-ს უნდობლობა გამოუცხადა. ამის შესახებ კირკიტაძემ გურჯაანის რაიონულ სასამართლოში მიმდინარე სასამართლო სხდომაზე განაცხადა, სადაც მისთვის აღკვეთის ღონისძიების შეფარდების საკითხზე მსჯელობენ.

კირკიტაძის განმარტებით, მას არ სურს, რომ გამოძიებას შსს აწარმოებდეს.

„შსს-ს ვუცხადებ უნდობლობას, თუმცა სასამართლოსთან მზად ვარ, ვითანამშრომლო. მე არ მსურს, გამოძიებას აწარმოებდეს შსს“, - განაცხადა კირკიტაძემ.

მოსამართლემ მას განუმარტა, რომ აღნიშნულ საკითხს სასამართლო არ წყვეტს.

პროცესზე, რომელზეც სასამართლო დავით კირკიტაძისთვის აღკვეთის ღონისძიების შეფარდებაზე მსჯელობს, პროკურატურა დავით კირკიტაძისათვის პატიმრობის გამოყენებას მოითხოვს. ბრალდებამ განმარტა, რომ არსებობს ბრალდებულის მხრიდან მოწმეებზე ზემოქმედების მოხდენის, მიმალვისა და ახალი დანაშაულის ჩადენის საფრთხე. ბრალდების პოზიციას არ ეთანხმება დაცვის მხარე.