სამართალი

შსს-მა ტელეკომპანია “რუსთავი 2”-თან მომხდარი ინციდენტის გამო კიდევ ხუთი პირი დააკავა

შსს-მა ტელეკომპანია “რუსთავი 2”-თან მომხდარი ინციდენტის გამო კიდევ ხუთი პირი დააკავა. ინფორმაცია ამის შესახებ შინაგან საქმეთა სამინისტრომ გაავრცელა.

„ქართული მარშის“ წევრები: მ.ა. ვ.ს. ი.დ. გ.ო. და ლ. ნ. დაკავებულები არიან საქართველოს სისხლის სამართლის კოდექსის 239-ე მუხლის მე-2 ნაწილის „ა“ ქვეპუნქტით, რაც გულისხმობს ხულიგნობას, ჩადენილს წინასწარი შეთანხმებით ჯგუფის მიერ და ისჯება თავისუფლების აღკვეთით ვადით 2-დან 5 წლამდე.

„სისხლის სამართლის საქმეზე გამოძიება გრძელდება დანაშაულის ჩამდენი სხვა პირების იდენტიფიცირების მიზნით – მიმდინარეობს მოწმეთა და თვითმხილველთა დაკითხვა, დანიშნულია შესაბამისი ექსპერტიზები“- ნათქვამია შსს-ს განცხადებაში.

20 მარტს შსს-მ ტელეკომპანია “რუსთავი 2”-თან მომხდარი ინციდენტის გამო „ქართული მარშის“ წევრი ლადო სადღობელაშვილი დააკავა. შსს-ს ინფორმაციით, სადღობელაშვილიც ჯგუფური ხულიგნობის ბრალდებითაა დაკავებული.

შეგახსენებთ, რომ "ქართულმა მარშმა" 19 მარტს ტელეკომპანია "რუსთავი 2"-თან საპროტესტო აქცია გამართა. აქციის მონაწილეები გიორგი გაბუნიას მიერ 17 მარტს ეთერში გასულ ხუმრობას აპროტესტებდნენ. მათ ტელეკომპანიის თანამშრომლებს სიტყვიერი და ფიზიკური შეურაცხყოფა მიაყენეს. ასევე დააზიანეს მანქანა, რომლითაც ჟურნალისტი გიორგი გაბუნია გადაადგილდებოდა.

ცირა გურგენიძე