სამართალი

შსს გიორგი ცერცვაძეზე ინფორმაცია რუსეთისთვის არ უნდა გადაეცა, რადგან იგი მნიშვნელოვან ინფორმაციას ფლობს - ოთარ კახიძე

„ევროპული საქართველოს“ წევრის, ოთარ კახიძის განცხადებით, საქართველოს მთავრობას რუსეთის ფედერაციისთვის ვიცე-პოლკოვნიკ გია ცერცვაძეზე ინფორმცია არ უნდა მიეწოდებინა, რადგან, კახიძის თქმით, ვიცე-პოლკოვნიკი მნიშვნელოვან ინფორმაციას ფლობს.

ამის შესახებ კახიძემ თემის კომენტირებისას მედიას განუცხადა.

„ შეგახსენებთ, ცერცვაძე შიდა ქართლში, კონფლიქტის ხაზთან იყო სპეცრაზმის უფროსის მოადგილე და მას აქვს ძალიან მნიშვნელოვანი ინფორმაციაც იმ ოპერაციების შესახებ, იმ მოქმედებების შესახებ, რასაც ქართული სამსახურები ეწეოდნენ. და აი ამ პიროვნებაზე საქართველოს შინაგან საქმეთა სამინისტრომ, თურმე დაცული არხებით, ეს რაღაცა შეღავათი ჰგონიათ, გადასცა ინფორმაცია რუსეთის ფედერაციას. ეს არ უნდა გაეკეთებინა. შესაძლოა ცერცვაძის ექსტრადირება მოხდეს და შემდგომ იგი დაექვემდებაროს წამებას და არაადამიანურ მოპყრობას“,-აღნიშნა კახიძემ.

ვიცე-პოლკოვნიკი გიორგი ცერცვაძე 15 იანვარს კიევის აეროპორტში რუსეთის ფედერაციის მიერ ინტერპოლში გაკეთებული შესაბამისი მოთხოვნის საფუძველზე დააკავეს.

ცერცვაძეს ბრალად, ქალაქ სოჭში 2003 წელს მომხდარ განზრახ მკვლელობასა და მკვლელობის მცდელობაში ედება ბრალი.

ამჟამად ცერცვაძე კიევის სასამართლოს გადაწყვეტილებას ელოდება.

მონიკა დავლიანიძე