პოლიტიკა

შს მინისტრი კრიმინალური პოლიციის რეფორმირებას აპირებს

შინაგან საქმეთა მინისტრი გიორგი გახარია კრიმინალური პოლიციის რეფორმირებას გეგმავს. ამის შესახებ მან ჟურნალისტებს განუცხადა მთავრობის სხდომის დასრულების შემდეგ.

„სამწუხაროდ, კრიმინალური პოლიცია, რომლის ნაწილსაც შეადგენს უბნის ინსპექტორ-გამომძიებელი, დღეს საჭიროებს სტრუქტურულ რეფორმებს და ჩვენ ამაზე ცოტა მოგვიანებით ვისაუბრეთ. ამიტომ იმ სახით, რითაც დღეს ჩვენ გვაქვს ე.წ. უბნის ინსპექტორები, რა თქმა უნდა, ვერ ჩაერთვებიან ამ თემაში - სკოლის ტერიტორიაზე წესრიგის დამყარებაში. ეს სხვა ამოცანებია, სხვა ფსიქოლოგიური პორტრეტის ადამიანებია“, - თქვა უწყების ხელმძღვანელმა.

გახარიას განმარტებით, კრიმინალური პოლიცია დანაშაულის პრევენციაზე უნდა იყოს ორიენტირებული

„ეს პოლიცია, კრიმინალური პოლიცია, როგორც სამართალდამცავი სტრუქტურის ძირითადი ხერხემალი, უნდა იყოს უფრო ეფექტური და, რა თქმა უნდა, უპირველეს ყოვლისა, უფრო დანაშაულის პრევენციაზე ორიენტირებული. ეს არის ძირითადი ამოცანა კრიმინალურ პოლიციაში იმ სტრუქტურული რეფორმების, რომელსაც ჩვენ დავგეგმავთ და განვახორციელებთ“, - განაცხადა შს მინისტრმა.