სამართალი

შოთა პაკელიანი პოლიციელებმა გააშიშვლეს სხვა უცხო ადამიანების თანდასწრებით - ადვოკატი

პროკურატურამ შოთა პაკელიანი მოწმის სახით გამოკითხა. ის გამომძიებლების კითხვებს 5 საათს პასუხობდა.

საქმე ეხება პოლიციელების მხრიდან დაკავებისას პაკელიანის სავარაუდო ცემის ფაქტს.

პაკელიანის ადვოკატის , გიორგი მახარაძის განცხადებით, მისი დაცვის ქვეშ მყოფმა ამომწურავი ინფორმაცია მიაწოდა საგამოძიებო უწყების წარმომადგენლებს.

მისივე ინფორმაციით, ბრალდებულმა დაკითხვისას გაიხსენა მისი დაკავების მომენტი და კონკრეტული სამართალდამცველების გვარებიც დაასახელა.

,,ჩემი დაცვის ქვეშ მყოფმა ისაუბრა დეტალურად არაადამიანური და დამამცირებელი მოპყრობის ფაქტზე. ის გააშიშვლეს სხვა უცხო ადამიანების თანდასწრებით, რა დროსაც მან თავი იგრძნო დამცირებულად. დაასახელა ორი პოლიციელი, რომელიც ზუსტად ახსოვს და რომლებიც უშუალოდ მას აყენებდნენ ფიზიკურ შეურაცხყოფას, ანუ ცემდნენ აღიარების მოთხოვნით’’, - განუცხადა ჟურნალისტებს ადვოკატმა.

ცნობისათვის, შინაგან საქმეთა სამინისტრომ შოთა პაკელიანი გასულ კვირას ახალი ფსიქოტროპული ნივთიერების განმეორებით შეძენა-შენახვა, გადაზიდვის ბრალდებით დააკავა.

გამოძიების ინფორმაციით, პოლიციამ შოთა პ.-ს პირადი ჩხრეკისას, 0,0664 გრამი ნარკოტიკული საშუალება - ე.წ. „ბიო“ ამოიღო.

ნინო ექვთიმიშვილი