სამართალი

შოთა ხიზანიშვილი იდგა კამერის უკან, ჩვენებას ისმენდა და პროდიუსერივით იქცეოდა- ნათია გედენიძე

თბილისის საქალაქო სასამართლოში ე.წ ფოტოგრაფების საქმეზე პროკურატურის მთავარი მოწმე ნათია გედენიძე დაიკითხა.

როგორც გედენიძემ სასამართლო პროცესზე განაცხადა, მას 2011 წელს გამოძიებისთვის ჩვენება ზეწოლის შედეგად მიაცემინეს.

მისი თქმით, როდესაც სამართალდამცველებს ჩვენებას აძლევდა, შსს-ს ყოფილი მინისტრის მოადგილე შოთა ხიზანიშვილი იდგა კამერის უკან, ჩვენებას ისმენდა და პროდიუსერივით იქცეოდა.

„მე არ ვიცოდი, რისთვის ვიყავი დაკავებული და არ ვიცოდი, რა უნდა მეღიარებინა. მერე მომაწოდეს ფურცელი, სადაც ეწერა, რომ ვითომ ჩემმა მეუღლემ წინა დღეებში მითხრა, რომ შარში ვარო. მე ამას შევეწინააღმდეგე. დამთანხმდნენ ამ სიტყვების ამოღებაზე. დანარჩენი ტექსტი კი დამაზეპირებინეს და გამიყვანეს კამერასთან. იქ იყო შოთა ხიზანიშვილი. იდგა კამერის უკან, სადღაც, კედელთან. იქცეოდა, როგორც პროდიუსერი. აკვირდებოდა ამ პროცესს. ეს დაზეპირებული ჩვენება რამდენიმე ცდის შემდეგ გამართულად ჩავწერე. ამ დროს მომესმა ფრაზა, ვიღაცამ ტელეფონით ვიღაცას უთხრა, ქალი ყოჩაღადაა, კაცი გვაწვალებსო“, - განაცხადა გედენიძემ.

დღევანდელი პროცესი დასრულდა. სასამართლო სხდომა ხვალ ნათია გედენიძის მეუღლის, ირაკლი გედენიძის დაკითხვით განახლდება.

შეგახსენებთ, ე.წ ფოტოგრაფების საქმეზე კონტრდაზვერვის უფროსის ყოფილი მოადგილე დავით დევნოზაშვილი, სამსახურებრივი უფლებამოსილების გადამეტების ბრალდებით არის დაკავებული.

ასევე, სისხლის სამართლის პასუხისგებაშია მიცემული სასჯელაღსრულების გლდანის მერვე დაწესებულების ყოფილი დირექტორი ალექსანდრე მუხაძე, რომელიც ამჟამად წითელი ცირკულარით იძებნება.

საუბარია 2011 წელს ჯაშუშობის ბრალდებით ოთხი ფოტოგრაფის - ზურაბ ქურციკიძის, ირაკლი და ნათია გედენიძეებისა და გია აბდალაძის დაკავების საქმეზე.

ფოტოგრაფები მოგვიანებით საპროცესო შეთანხმების საფუძველზე გაათავისუფლეს.

მონიკა დავლიანიძე