სამართალი

შინაგან საქმეთა სამინისტრო გირაოთი გათავისუფლებული პატრულ-ინსპექტორის საკითხს ეხმაურება

შინაგან საქმეთა სამინისტრო გირაოთი გათავისუფლებული პატრულ-ინსპექტორის საკითხს სპეციალური განცხადებით გამოეხმაურა.

“შინაგან საქმეთა სამინისტროს ერთ-ერთი პრიორიტეტული მიმართულება ოჯახში ძალადობის წინააღმდეგ ბრძოლაა. სწორედ ამ მიზნით, გენერალური ინსპექცია აქტიურად მუშაობს სამინისტროს თანამშრომლებს შორის მსგავსი ფაქტების გამოვლენაზე, ახდენს მყისიერ და დროულ რეაგირებას“, - ნათქვამია განცხადებაში.

უწყების ინფორმაციითვე, პატრულ-ინსპექტორის მიერ ოჯახში ჩადენილი დანაშაულის შესახებ ინფორმაცია თბილისის პროკურატურას სამინისტროს გენერალურმა ინსპექციამ მიაწოდა.

საქართველოს პროკურატურის თანამშრომლებმა პატრულ-ინსპექტორი ლ. რ. , 14 თებერვალს, თბილისის საქალაქო სასამართლოს მიერ გაცემული განჩინების საფუძველზე დააკავეს.

გამოძიებით დადგინდა, რომ ლ. რ.-მ 2018 წლის 4 იანვარს, არასრულწლოვანი შვილის თანდასწრებით ფიზიკური შეურაცხყოფა მიაყენა მეუღლეს. ჩადენილი ქმედება გათვალისწინებულია საქართველოს სსკ-ის 1261-ე მუხლის მე-2 ნაწილის „ბ“ ქვეპუნქტით, რაც სასჯელის სახედ და ზომად თავისუფლების აღკვეთას ერთიდან სამ წლამდე ვადით ითვალისწინებს.

დღეს, თბილისის საქალაქო სასამართლომ ბრალდების მხარის შუამდგომლობა არასრულწლოვანი შვილის თანდასწრებით მეუღლის მიმართ ოჯახური ძალადობის განხორციელების ფაქტზე დაკავებული პატრულ-ინსპექტორის მიმართ აღკვეთის ღონისძიების სახით პატიმრობის მოთხოვნის შუამდგომლობა არ დააკმაყოფილა და ბრალდებულს აღკვეთის ღონისძიების სახით 5 000-ლარიანი გირაო შეუფარდა.