საზოგადოება

შიდსით საქართველოში 2 333 პირია გარდაცვლილი

2025 წლის 20 იანვრის მონაცემებით, საქართველოში აივ ინფექცია/შიდის 11 000-მდე შემთხვევაა აღრიცხული. აქედან 2 333 პირი გარდაცვლილია. ამის შესახებ თბილისში, სასტუმრო „რუმსში“ გამართულ მედიასემინარზე შიდსის ჯანდაცვის ფონდის საქართველოს პროგრამის მენეჯერმა ნინო ხეთაგურმა განაცხადა.

მისი თქმით, ინფიცირებულთაგან 721 პაციენტი დროებით ოკუპირებული აფხაზეთიდანაა.

„ინფექციის გავრცელების არელის მიხედვით, თბილისი ლიდერობს. მეორე ადგილზეა აჭარა, მესამეზე - სამეგრელო, მეოთხეზე - იმერეთი. დაავადება, ძირითადად, რეპროდუქციული ასაკის მოქალაქეებში ვლინდება. ინფიცირებულთა უმეტესობა მამაკაცია“, - აღნიშნა ნინო ხეთაგურმა.

მისივე ინფორმაციით, შიდსის ჯანდაცვის ფონდის საქართველოს წარმომადგენლობა (AHF საქართველო) თბილისში 2018 წლიდან საქმიანობს და მოსახლეობას ინდივიდზე ორიენტირებულ ტესტირებას სთავაზობს. დღეისათვის ყველა მსურველს აქვს საშუალება, ტესტირება კომბინირებული ტესტით ჩაიტაროს და 1 ჩხვლეტით 4 პასუხი შემდეგ დაავადებებზე მიიღოს: აივ ინფექცია, B და C ჰეპატიტი, სიფილისი.

ტესტირება სწრაფი, ანონიმური და უფასოა.

როგორც ამავე ორგანიზაციის ახალგაზრდული ცენტრის კოორდინატორმა მარიამ ნათაძემ აღნიშნა, ანტირეტროვირისული მკურნალობის დროს ინფიცირებული პირი ინფექციას აღარ ავრცელებს. ამასთან, მას შემდეგ, რაც საქართველოში შესაბამისი მკურნალობა დაიწყო, აივინფიცირებული ბავშვი არ დაბადებულა.

“დაავადების პრევენციასა და მკურნალობას ხელს სტიგმა და დეზინფორმაცია უშლის. ამიტომაც, ჩვენი უმთავრესი მიზანი მოსახლეობის ცნობიერების ამაღლება და ახლაგაზრდებში ჯანსაღი ცხოვრების წესის პოპულარიზაციაა”, -- თქვა მარიამ ნათაძემ.

სპეციალისტები მოსახლეობას შეახსენებენ, რომ აივ ინფექცია/შიდსი არ გადადის ხელის ჩამორთმევით, კოცნით, საერთო ჭურჭლის გამოყენებით, საცურაო აუზიდან და ა.შ.

დაავადების გავრცელების პირველ ეტაპზე საქართველოში, ძირითადად, ნარკოტიკების ინტრავენური მომხმარებლები ინფიცირდებოდნენ. ამჟამად კი მისი გადაცემის წამყვანი მიზეზი ჰეტეროსექსუალური გზაა.

შეხვედრის დასასრულს სპეციალისტებმა ჟურნალისტების შეკითხვებს უპასუხეს.

მედიასემინარი პიარკომპანია “ჯეპრას” ორგანიზებით ჩატარდა.