სამართალი

შესაძლებელია, თეა წულუკიანზე ლევან კალაძის გატაცების შემკვეთები გავიდნენ და იგი კორუფციულ გარიგებაში ჩაითრიეს - თბილისის ყოფილი პროკურორი

თეა წულუკიანმა დანიშვნისთანავე წარმატებით გააგრძელა ელიტურ კორუფციული საქმიანობა. ამ პერიოდში წულუკიანის საჯარო განცხადება, ლევან კალაძის გატაცებაში მონაწილე პირების უდანაშაულობის შესახებ, სწორედ კორუფციულ გარიგებაში მის მონაწილეობას ადასტურებდა, - განაცხადა თბილისის ყოფილმა მთავარმა პროკურორმა ვალერი გრიგალაშვილმა გაზეთ ,,ქრონიკა +’’-სთან ინტერვიუში.

მისი თქმით, თეა წულუკიანმა დაივიწყა ის ფაქტიც კი, რომ ლევან კალაძის ძმა, კახა კალაძე მისი თანაგუნდელი იყო.

,,წულუკიანი თანამდებობის ბოროტად გამოყენებით შეეცადა კალაძის გატაცებისა და მკვლელობის საქმის ძირის გამოთხრას და მსჯავრდებულთა გათავისუფლებას. წულუკიანს ახალი გაკეთებული ჰქონდა ეს დანაშაულებრივი საჯარო განცხადება, როდესაც იუსტიციის სამინისტროს ლიფტთან მისი მოადგილე, ალექსანდრე ბარამიძე შემხვდა, რომელსაც ვუთხარი, რომ მინისტრს არ ჰქონდა ასეთი განცხადების გაკეთების უფლება, რომ ეს განცხადება ანტისახელმწიფოებრივი იყო. სავარაუდოდ, ასეთმა წინააღმდეგობამ აიძულა წულუკიანი, ხელი აეღო თავის დანაშაულებრივ განზრახვაზე, მაგრამ ამ ფაქტმა ეს ბოროტი ქალბატონი კიდევ უფრო გააბოროტა და პოლიტსაბჭოს მეშვეობით შურისძიებას შეეცადა, რის გამოც იძულებული გავხდი, სამსახურიდან წამოვსულიყავი“, - განაცხადა გრიგალაშვილმა.

თბილისის ყოფილმა პროკურორმა 2004 წელიც გაიხსენა, როდესაც ის აღნიშნულ თანამდებობას იკავებდა.

გრიგალაშვილის განცხადებით, მას ტელეფონით დაუკავშირდა იმ პერიოდში უგზო-უკვლოდ დაკარგული ლევან კალაძის მამა, კარლო კალაძე და სთხოვა, გენერალური პროკურატურიდან ეს საქმე ქალაქის პროკურატურაში წამოეღო. მისივე თქმით, თავდაპირველად თხოვნაზე უარი უთხრა, რადგან საქმე გამოსაძიებლად გენერალურ პროკურატურაში იყო და ამასთან, ახალი მომხდარი იყო ფაქტი, როდესაც სვანეთში შუა საუკუნეებში გარდაცვლილი ადამიანის ნეშტს მიაკვლიეს და ისე წარმოაჩინეს, თითქოს ის იყო უგზო-უკვლოდ დაკარგული ახალგაზრდის ნეშტი. როგორც გრიგალაშვილი ამბობს, მას საქმის წამოღებას სთხოვდა თბილისის პოლიციის მთავარი სამმმართველოს უფროსის მოადგილე გენერალი, დავით კეკუაც, რომელიც შემდგომში მეშვიდე საპყრობილეში გარდაიცვალა. გრიგალაშვილი არ გამორიცხავს, რომ კეკუას გარდაცვალების ფაქტზე კვალიფიციური გამოძიება თუ ჩატარდება, შესაძლოა, დადგინდეს, რომ მას თავი არ მოუკლავს, არამედ მოკლეს, როგორც დიდი ინფორმაციის მატარებელი.

,,კარლო კალაძე ჩემთან მიღებაზე იმყოფებოდა და საქმის წამოღებას მთხოვდა. ამჯერად კაცის ცრემლებს ვეღარ გავუძელი და შევპირდი, რომ საქმის წამოღების გარეშეც შეიძლებოდა მისი თხოვნის შესრულება, პოლიციას წერილობით დავალებას მივცემდი და ისინი გაააქტიურებდნენ სამძებრო-ოპერატიულ ღონისძიებებს. მიუხედავად იმისა, რომ პროკურატურის ეთიკის კოდექსისა და საპროცესო კანონმდებლობის მიხედვით, მე არ მქონდა უფლება სხვა დანაყოფის წარმოებაში მყოფ საქმეში ჩარევისა, დაზარალებულის თხოვნას ანგარიში გავუწიე და დავით კეკუას წერილობითი მიმართვა-დავალება გადავეცი. დავით კეკუასთან საუბრის შემდეგ დავრწმუნდი, რომ პოლიციას მართლა ჰქონდა ინფორმაცია არამხოლოდ ლევან კალაძის გამტაცებლის, არამედ დანაშაულის შემკვეთების შესახებაც.

პოლიციის ინფორმაციის გადამოწმების მიზნით ისანი-სამგორის პროკურატურიდან გამოთხოვილ იქნა იმ პერიოდში უცნობი მამაკაცის გვამის აღმოჩენის ფაქტზე არაღძრული რამდენიმე მასალა. ერთ-ერთი მასალის გაცნობის შემდეგ დავრწმუნდი, რომ პოლიციის ინფორმაცია უტყუარი იყო, ვინაიდან გვამის აღწერილობა და ტანსაცმელი ამ ინფორმაციის უტყუარობაზე მიუთითებდა. ფაქტზე აღიძრა საქმე და გენერალური პროკურატურას დნმ-ის ექსპერტიზის ჩატარების მიზნით გადაეგზავნა. ასე ჩაეყარა საფუძველი იმ საქმის გახსნას, რომლის დანგრევასაც აპირებდა თეა წულუკიანი. სავარაუდოდ, შესაძლებელია, თეა წულუკიანზე ამ დანაშაულის შემკვეთები გავიდნენ და იგი კორუფციულ გარიგებაში ჩაითრიეს“, - განაცხადა ვალერი გრიგალაშვილმა.